“სესხის აღებისას ბანკმა შეიძლება, მოითხოვოს სხვადასხვა ტიპის გარანტია ან უზრუნველყოფა. ეს შესაძლოა, იყოს უძრავი ქონებით უზრუნველყოფა, ავტომობილით ან სხვადასხვა მოძრავი ნივთით უზრუნველყოფა. ასევე, უზრუნველყოფის ერთერთი სახეობაა თავდებობა – როდესაც მეორე ადამიანი თავდებში უდგება მსესხებელს. ეს ძირითადად გამოიყენება იპოთეკური სესხის დროს – მას, ვინც იღებს სესხს, უწევს შეძენილი, საკუთარ ან მისი ოჯახის წევრის მფლობელობაში არსებული უძრავი ქონების დატვირთვა იპოთეკით, სანამ სესხს გადაიხდის. შესაბამისად, თუ ის ვერ გადაიხდის ვალდებულებას, შემდეგ უკვე იწყება დავა უძრავ ქონებაზე”, – ამის შესახებ “საზოგადოება და ბანკების” დამფუძნებელი, გიორგი კეპულაძე “თბილისი თაიმსს” ესაუბრა.
როგორც კეპულაძემ აღნიშნა, როდესაც საქმე უძრავი ქონების ჩადებას ეხება, მომხმარებელი კარგად უნდა დაფიქრდეს, შეძლებს თუ არა გადახდას.
“ამიტომ, ძალიან მნიშვნელოვანია, რომ როდესაც უძრავ ქონებას ეხება საქმე, კარგად დავფიქრდეთ, შეგვიძლია თუ არა სესხის აღება და შემდეგ უკვე დროული გადახდა. ძალიან ყურადღებით უნდა მოვეკიდოთ უზრუნველყოფის ჩადებას სესხის სანაცვლოდ, რადგან, ცხადია, უძრავი ქონების დაკარგვა მორალურად, ფსიქოლოგიურად, ეკონომიკურად, ფინანსურად ძალიან მძიმეა.
რომ შევაჯამოთ, უზრუნველყოფის ხსენებული სახეები არსებობს – მოძრავი ან უძრავი ქონებით უზრუნველყოფა და შეიძლება, ვთქვათ, რომ თავდებობაც არის ერთერთი სახეობა, ბანკისთვის გარანტია – რომ თუ ძირითადი მსესხებელი ვერ მოახერხებს გადახდას, მაშინ ისინი მიმართავენ თავდებ პირს. ბანკები გარანტიასა და უძრავი ქონებით უზრუნველყოფას ითხოვენ, რადგან ჰქონდეთ გარანტია, რომ მათ მიერ გაცემული თანხა არ დაიკარგება”, – განაცხადა გიორგი კეპულაძემ.
