ივანე ჯავახიშვილის სახელობის თბილისის სახელმწიფო უნივერსიტეტის რექტორმა ლადო პაპავამ 100-დღიანი მუშაობის ანგარიში წარადგინა.
როგორც პაპავამ ჟურნალისტებს განუცხადა, ამ 100 დღის განმავლობაში ყველა პრობლემის გადაწყვეტა შეუძლებელი იქნებოდა, თუმცა გარკვეული ინიციატივები და ტენდენციები უკვე გამოიკვეთა.
“ყველაზე მნიშვნელოვანი ინიციატივა, ვფიქრობ, არის ის, რომ პირველად საქართველოში სწორედ ივანე ჯავახიშვილის სახელობის თბილისის სახელმწიფო უნივერისტეტი გაიზიარებს მსოფლიო წამყვანი უნივერისტეტების გამოცდილებას და 2014 წლიდან ამოქმედდება პოსტდოქტორანტურის ინსტიტუტი. ეს იყო ჩემი ერთ-ერთი დაპირება. კონკურსის მეშვეობით შერჩეულ 12 დოქტორს პოსტდოქტორანტურაში დასაქმების, სამეცნიერო კვლევაში ჩართვის საშუალება მიეცემა”, – განაცხადა ლადო პაპავამ.
მისივე თქმით, ასევე მნიშვნელოვანია, რომ სამეცნიერო კვლევის ხელშეწყობის მიზნით ყოველი წლის აპრილში ივანე ჯავახიშვილის ხსოვნისადმი მიძღვნილი ორი სამეცნიერო ფორუმი გაიმართება, რომლებიც პროფესორებთან და მეცნიერ-მკვლევარებთან ერთად სამივე საფეხურების (ბაკალავრიატი, მაგისტრატურა, დოტქორანტურა) სტუდენტებსაც მისცემს საკუთარი შესაძლებობის გამოვლენის საშუალებას. როგორც პაპავამ აღნიშნა, საუკეთესო მოსმენების ავტორებს შესაბამისი სერტიფიკატი და პრემია გადაეცემათ. პაპავას თქმით, 2014 წლის აპრილში პირველად გაიცემა ივანე ჯავახიშვილის სახელობის საერთაშორისო პრემიაც, რომელიც ქართველოლოგიაში შეტანილი სამეცნიერო წვილილისთვის უცხო ქვეყნის მოქალაქეს ორ წელიწადში ერთხელ გადაეცემა.
ამასთან, როგორც პაპავამ აღნიშნა, მნიშვნელოვანი ინიციატივაა ისიც, რომ საუკეთესო პედაგოგებისთვის პრემია დაწესდა, რომელსაც ბაკალავრიატის სტუდენტები დაასახელებენ, ხოლო რექტორის სტიპენდიით დაჯილდოვდება ყოველ სემესტრში საუკეთესო აკადემიური მოსწრების მქონე სტუდენტი.
“გასული 100 დღის განმავლობაში ახალი შემადგენლობით მუშაობა განაახლა რექტორტის მრჩეველთა საბჭომ. სარედაქციო საგამომცემლო საბჭო განახლებული შემადგენლობით იზრუნებს საუნივერსიტეტო ბიბლიოთეკის გამრავალფეროვნებასა და სასწავლო ლიტერატურით უზრუნველყოფაზე, დაიწყო თანამედროვე სახელმძღვანელოების თარგმნის პროცესი, სასწავლო ლიტერატურის თარგმნისთვის 2014 წლის ბიუჯეტში 300 000 ლარზე მეტი გამოიყოფა. 100-დღიან პერიოდში კი უკვე შეძენილია 521 დასახლების 1 305 სახელმძღვანელო, მუშავდება ბიბლიოთეკის წიგნადი ფონდის ციფრულ მატარებლებზე გადატანის პროექტიც”, – განაცხადა პაპავამ.
მისივე თქმით, თბილისის სახელმწიფო უნივერისტეტის ადმინისტრაცია აქტიურად მუშაობს ლაბორატორიების განახლებაზე და ცოტა ხნის წინ თბილისის სახელმწიფო უნივერსიტეტში გაიხსნა მულტიმედია ცენტრი, რომელიც ჟურნალისტიკის და სხვა მიმართულების სტუდენტებს შესაბამისი უნარ-ჩვევების განვითარებაში დაეხმარება. აღიჭურვა ფიზიკის ახალი ლაბორატორია, თსუ-ს მონაწილეობით იქნება ქართული შრიფტების ლაბორატორიებიც.
როგორც თსუ-ს რექტორი აღნიშნავს, გასული 100 დღე მნიშვნელოვანი იყო იმითაც, რომ ცვლილებები შეეხო აკადემიური თანამდებობის დასაკავებლად კონკურსის ჩატარების და კონკურსის გასაჩივრების წესებს, ანუ კონკურსანტებს შეეძლებათ ისარგებლონ აპელაციის მარტივი მექანიზმით.
“ასევე მნიშვნელოვანია, რომ მოხდება ადმინისტრაციული და სახელფასო რეფორმა უნივერსიტეტში, რომლის გატარებაც 2014 წელს იგეგმება. მომავალ წელს ასევე ფუქნციონირებას დაიწყებს კარიერული ცენტრი, რომლის მთავარი ფუნქცია ბიზნესის თსუ-სთან დაახლოება, კერძოდ, სტუდენტების ბიზნესში ჩართულობის გაზრდა იქნება. ასევე მე აქტიურად ვაგრძელებ თანამშრომლობას სამთავრობო სტრუქტურებთან. ბოლო პერიოდში საქართველოს მთავრობას რამდენიმე ინიციატივით მივმართე, მათ შორის დოქტორანტურის სახელმწიფო ბიუჯეტიდან სრულად დაფინანსების შესახებ, გეოგრაფიისა და გეოლოგიის მიმართულებების სრულ საბიუჯეტო დაფინანსებაზე და თსუ-სთან ინტეგრირებული კვლევითი ინსტიტუტების შენობების შენარჩუნების აუცილობლობასთან დაკავშირებით. ასევე ვითარდება უნივერისტეტის თანამშრომლობა არასამთავრობო ბიზნესსექტორთან”, – განაცხადა პაპავამ.
მისივე თქმით, ასევე მნიშვნელოვანი ინიციატივაცაა ის, რომ შესაძლოა უნივერსიტეტდამთავრებულ პირს მიენიჭოს მასწავლებლის კვალიფიკაცია.
“ადრე ეს იყო, თუმცა დღეს აღარ არის. ვითხოვთ იმას, რომ მოგვეცეს საშუალება, უნივერსიტეტს თუ აქვს სურვილი კრედიტებში გაითვალისწინოს პედაგოგიური საგნები, ანუ თუ სტუდენტი დაამთავრებს უმაღლეს და იქნება ფიზიკოსი, ამავდროულად, შეეძლოს ფიზიკის მასწავლებლობა”, – განაცხადა პაპავამ.
მისივე თქმით, უნივერისტეტის ისტორიის წარმოსაჩენად დაიგეგმა რამდენიმე პროექტიც, კერძოდ, უნივერსიტეტის ისტორიულ შენობაში მიმდინარეობს სახელობითი აუდიტორიების და ძეგლების აღდგენა. ასევე უახლოეს პერიოდში უნივერსიტეტის პანთეონში ივანე ჯავახიშვილის ერთ-ერთი თანამოაზრის იოსებ ყიფშიძის ნეშტის გადმოსვენება მოხდება.
2014 წლის შემოდგომაზე თსუ იოსებ ყიფშიძის დაბადებიდან 130 წლის იუბილეს აღნიშნავს.
27.11.13
