შოვში, მეწყერის შედეგად დაკარგული 50 ადამიანიდან, რომლებთანაც კონტაქტი ვერ მყარდებოდა და მათი ადგილსამყოფელი უცნობი იყო, 6 მათგანთან კომუნიკაცია დამყარდა. ამის შესახებ მედიასთან რამდენიმე წუთის წინ ინფრასტრუქტურისა და რეგიონების განვითარების მინისტრმა ირაკლი ქარსელაძემ განაცხადა.
მისი ინფორმაციით, აღნიშნული 6 ადამიანი ცოცხალია და მათ სიცოცხლეს საფრთხე არ ემუქრება. ამ დროისთვის ისინი მამისონის მიმდებარედ, მაშველებთან ერთად იმყოფებიან და სტიქიის ზონიდან შესაძლებლობისთანავე გამოიყვანენ. მაშველები ამ 6 მოქალაქესთან ერთად მათ უსაფრთხო ადგილზე გამოყვანამდე დარჩებიან.
“არიან ადამიანები, რომლებსაც ვერ ვუკავშირდებით. დაახლოებით 50-მდე ადამიანი იყო, თუმცა უახლესი ინფორმაცია არის ის, რომ ექვსი ადამიანი, რომლებსაც ვერ ვუკავშირდებოდით, უკვე კავშირზე არიან და უსაფრთხოდ არიან. ბუნებრივია, ეს პროცესი გრძელდება. მიუხედავად ღამის საათებისა, 150 მაშველი იმყოფება უშუალოდ სტიქიის არეალში, როგორც უკვე უსაფრთხო ადგილზე გამოყვანილი ადამიანების მხარდასაჭერად, ასევე იმ არეალში შესაძლებლობის ფარგლებში საძიებო სამუშაოების განსახორციელებლად,” – განაცხადა ირაკლი ქარსელაძემ.
აქტიური სამაშველო სამუშაოები დილის ექვსი საათიდან ისევ განახლდება, რისთვისაც დამატებით 2 ვერტმფრენი გამოიყოფა.
შეგახსენებთ, მეწყერი შოვში დღეს დაახლოებით დღის 4 საათზე დაიწყო. სამაშველო-სამძებრო სამუშაოების შედეგად სტიქიის ზონიდან 70 ადამიანის გამოყვანა მოხერხდა, რომლებიც დაბინავდნენ და გაეწიათ ყველა შესაბამისი დახმარება, მათ შორის სამედიცინო, ვისაც ამის საჭიროება ჰქონდა.150-ზე მეტი ადამიანი კი უსაფრთხო ადგილას არის და მათ ვერტმფრენებით ხვალ გამოიყვანენ.
სამწუხაროდ, მაშველებმა მეწყერის დიდი მასის ქვეშ 2 ადამიანის ცხედარს მიაკვლიეს, რომელთა იდენტიფიცირება ჯერ არ მომხდარა. სტიქიის ზონაში 400-მდე მეხანძრე-მაშველი მუშაობს.
