„ყველამ უნდა გაიცნოს ის ადამიანები, რომლებიც ქართულ მართლმსაჯულებას არცხვენენ. შესაძლოა ძალიან მალე ურთმელიძის სახელობის მოსამართლეთა გილდიას კიდევ შეემატოს რამდენიმე მოსამართლე,“ – განაცხადა ტელეკომპანია „რუსთავი-2“-ის გენერალური დირექტორის მოადგილემ ზაალ უდუმაშვილმა „ტვ-პირველზე“ „ინგა გრიგოლიას დღის ამბების“ ეთერში.
„თუ გამოძიება ამ ტემპებით წავა, შესაძლოა ზაფხულში რუსთავი-2-ს საბოლოო ვერდიქტი გამოუტანონ. პროცესები დაიწყო წინასაარჩევნოდ საინფორმაციო ველის გასუფთავებით. დაიხურა რამდენიმე თოქ-შოუ. როგორც ჩანს რუსთავი-2 აღმოჩნდა მსუყე ლუკმა შემოდგომაზე, რომელიც ვერ გადაყლაპა ხელისუფლებამ. ეჭვი მაქვს ძალიან ბევრს დაახრჩობს კიდეც ეს ლუკმა. გარანტია არ არსებობს, თუმცა ყველა ღონეს ვიხმართ, რომ ეს ომი მოვიგოთ. თუ ხელისუფლება არხს მაინც გააჩუმებს, ამით დაზარალდება არა მხოლოდ რუსთავი-2, არამედ მთელი ქვეყანა. არც ერთი საერთაშორისო ძალა არჩევნებს არ ცნობს დემოკრატიულად თუ ქვეყანაში არ იქნება მთავარი ოპოზიციური არხი.
ხელისუფლებას ახალი სტრატეგია აქვს, ფერებ-ფერებით ცდილობს ჩვენს მოგუდვას. პრემიერ-მინისტრი ამბობს,რომ უყვარს „რუსთავი-2“ და ურჩევნია ის იყოს ოპოზიციური არხი. რეალურად ამ სიტყვების უკან ვხედავთ ფორსირებულ სასამართლო პროცესებს ჩვენს გასაჩუმებლად. სასამართლომ შეიძლება განაჩენი შემდეგ სხდომაზე გამოიტანოს,“- აცხადებს უდუმაშვილი.
მანანა ღოღობერიძე
