დაშავებული ქართველი სამხედრო მოსამსახურეები აშშ-ში დღეს, გამთენიისას გაემგზავრნენ. დაჭრილი ჯარისკაცები პროტეზირების პროგრამას აშშ-ში, სან დიეგოს პიტერ ჰარშის საპროტეზო კლინიკაში გაივლიან. ისინი აეროპორტში ოჯახის წევრებმა და თანამებრძოლებმა გააცილეს.
როგორც თავდაცვის უწყებიდან „თბილისის თაიმსს“ აცნობეს, რეაბილიტაციის კურსი პირველ ეტაპზე 8 სამხედრო მოსამსახურეს ჩაუტარდება. მათი შერჩევა დაზიანებების სიმძიმის მიხედვით მოხდა. დაშავებულ ჯარისკაცებთან ერთად ამერიკულ კლინიკაში ერთი ქართველი პროტეზირების სპეციალისტიც გაემგზავრა, რომელიც ბიო-ელექტრო X3 ტიპის პროტეზებზე მუშაობის სპეციფიკას დაეუფლება. სამხედროების მკურნალობის კურსს ზედამხედველობას ქართველი ექიმი, მაიორი ზვიად ბურძგლა გაუწევს.
დაშავებულ სამხედროებს მექანიკურ კიდურებს ბიო-მიკრო პროცესიანი პროტეზით შეუცვლიან. უახლესი თაობის ელექტრო კიდური სამხედრო მოსამსახურეებს რთულ რელიეფზე გადაადგილებას გაუადვილებს. ექსტრემალური პირობების გამძლე ახალი პროტეზი ჯარისკაცებს მეტი აქტიურობის საშუალებას მისცემს. პიტერ ჰარშის საპროტეზო კლინიკაში რეაბილიტაციის კურსი ყველა სამხედროსთვის ინდივიდუალურია.
პროტეზირების პროგრამისა და შემდგომი რეაბილიტაციის გავლისათვის ამერიკის შეერთებულ შტატებში 19 ჯარისკაცი გაემგზავრება. ამისათვის სარეზერვო ფონდიდან უკვე გამოყოფილია 866,000 აშშ დოლარი. სამომავლოდ, კონტრაქტით გათვალისწინებული 2.816,519.20 დოლარის დარჩენილი თანხის გამოყოფა თავდაცვის ბიუჯეტიდან იგეგმება. ეს პროგრამა მომავალში ყველა ამპუტირებულ სამხედრო მოსამსახურეზე გავრცელდება.
აშშ-ში გამგზავრებამდე, დაშავებული სამხედროები სრულიად საქართველოს კათოლიკოს-პატრიარქმა ილიამ II-მ დალოცა, გამოჯანმრთელება და სამშობლოში მალე დაბრუნება უსურვა. საქართველოში დაბრუნების შემდეგ, ჯარისკაცები საკუთარ ქვედანაყოფებს დაუბრუნდებიან და შეიარაღებულ ძალებში გააგრძელებენ მსახურს.
27.12.13
