მიუხედავად მზიანი ამინდებისა, ზამთარი სულ მალე დადგება და თითოეულმა ჩვენგანმა ცივი თვეების კომფორტულად გადაგორებისთვის ჩვენ-ჩვენი ზომები უნდა მივიღოთ. დღევანდელი ბლოგის საშუალებით რამდენიმე სასარგებლო რჩევას მოგცემთ, რომლებიც ზამთრის სუსხში დაგეხმარებათ, სახლში სასიამოვნო ტემპერატურა შეინარჩუნოთ. შეიძლება იფიქროთ, რომ გათბობის სისტემა მთავარი ფაქტორია და თუ ის გამართულად მუშაობს, მაშინ სითბოც გარანტირებული გაქვთ. სინამდვილეში, ასე სულაც არ არის. მიუხედავადა იმისა, რომ დიდწილად სწორედ გამათბობლებზეა ტემპერატურა დამოკიდებული, არსებობს სხვა ფაქტორებიც, რომლებიც ტემპერატურაზე დიდ გავლენას ახდენს. ქვევით სწორედ მათზე ვისაუბრებთ.
იზრუნეთ სახლის თბოიზოლაციაზე
პირველი, რაც ზამთრის დადგომამდე უნდა გააკეთოთ, სახლის თბოიზოლირებაა. თუ სახლში სხვენი გაქვთ, კარგად შეამოწმეთ იქაურობა და დარწმუნდით, რომ სითბო არსად იპარება. იგივე გააკეთეთ სახლის ძირითად ნაწილშიც, უფრო ზუსტად, კედლებსა და იატაკზე. კარგად დაათვალიერეთ თითოეული წერტილი. როცა სახლი სრულყოფილადაა იზოლირებული, მისი გათბობა უფრო მარტივია, შესაბამისად, გადასახადები – გაცილებით დაბალი.
ჩამოკიდეთ სქელი ფარდები
წინა ნაწილის ერთგვარი გაგრძელებაა სქელი ფარდებით ფანჯრების დაფარვა. სქელი ან სპეციალური თერმული ფარდები იზოლაციის ერთ-ერთი საუკეთესო საშუალებაა და დიდ როლს ასრულებს ზამთარში სითბოს შენარჩუნებაში. მაგრამ არ დაგავიწყდეთ ისიც, რომ ფარდები დღის განმავლობაში გადაწიოთ, განსაკუთრებით კი მაშინ, როცა მზიანი ამინდია. მზის სინათლე ბუნებრივ სითბოდ გარდაიქმნება მთელი დღის განმავლობაში. დაგროვებული სითბოს შესანარჩუნებლად კი მოსაღამოვებისთანავე ჩამოაფარეთ თქვენი ფარდები.
გამართეთ გათბობის სისტემა
დასაწყისში გათბობის სისტემა უკვე ვახსენეთ, მაგრამ, მოდი, კიდევ ერთხელ გავმეორდეთ. ნოემბერი საუკეთესო დროა, ერთი წლის უმოქმედო გათბობის სისტემა ხელოსანს შეამოწმებინოთ და დარწმუნდეთ, რომ ცენტრალური გათბობის ქვაბი და სხვა კომპონენტები გამართულად მუშაობს. თუ რაიმე პრობლემა იჩენს თავს, ზამთრამდე დარჩენილი მონაკვეთი სრულიად საკმარისი იქნება ხარვეზების გამოსასწორებლად.
დააგეთ ხალიჩები
ფარდებთან ერთად, ხალიჩებისს არ უნდა დაგვავიწყდეს. განსაკუთრებით კი ისეთ ოთახებში, სადაც მეტლახის იატაკია. ხისა და ლამინატისგან განსხვავებით, მეტლახის იატაკი სითბოს ვერ ინარჩუნებს. ხალიჩები კი სითბოს დამატებით ფენას შექმნის და სითბოსთან ერთად, სახლს უფრო კომფორტულს და ლამაზსაც გახდის.
შეინარჩუნეთ სინოტივე
იცოდით, რომ მშრალი ჰაერი უფრო ,,ცივია”, ვიდრე ნოტიო? მეცნიერები ამბობენ, რომ მშრალი ჰაერის გათბობა გაცილებით რთული საქმეა, ვიდრე ოდნავ ნოტიოს. ამიტომ, შეგიძლიათ სახლში ჰაერის დამატენიანებელი მოწყობილობები დააყენოთ, რომლებსაც ამავდროულად სასიამოვნო სურნელი აქვთ. გარდა იმისა, რომ სახლის გათბობა გაგიადვილდებათ, სუფთა, გაწმენდილი ჰაერი თქვენი და თქვენი ოჯახის წევრების ჯანმრთელობაზეც დადებითად იმოქმედებს.
აკონტროლეთ ტემპერატურა ოთახებში
ბევრ ჩვენგანს გვაქვს სახლში ისეთი ოთახები, რომლებსაც არ ვიყენებთ ან ვიყენებთ, მაგრამ იშვიათად. სახლის აქტიური ნაწილი რომ უფრო მარტივად გაათბოთ, შეგიძლიათ, გამოუყენებელი ოთახების კარები დახუროთ და სითბო ფუჭად არ დახარჯოთ. სჯობს, იმ ოთახების გათბობაზე ვკონცენტრირდეთ, სადაც დროის უდიდეს ნაწილს ვატარებთ.
შეჯამება
როგორც ვნახეთ, სახლის გათბობაში გათბობის სისტემის გარდა უამრავი ფაქტორი იღებს მონაწილეობას. დარწმუნებული ვართ, ჩვენი რჩევების გათვალისწინებით ზამთარს თბილად, კომფორტულად და სასიამოვნოდ გაატარებთ თქვენც და თქვენი ოჯახის წევრებიც.
