მთელი საქართველო შეძრა მესტიაში, ჭუბერისკენ მიმავალ გზაზე მომხდარმა ავტოავარიამ, რასაც ახალგაზრდა ცოლ-ქმრის სიცოცხლე ემსხვერპლა. არსებული ინფორმაციით, ავტომობილი, რომლითაც ისინი გადაადგილდებოდნენ, გზიდან მდინარეში გადავარდა.
გარდაცვლილები არიან მზეო უმფრიანი და ლევანი ანსიანი. წყვილს ოთხი არსრულწლოვანი შვილი დარჩა.
როგორც ირკვევა, ტრაგედიის ადგილი ძალიან ვიწროა და იმ საბედისწერო დღეს იმ მონაკვეთზე მათ შემხვედრი ტრანსპორტი შეხვდათ.
“მარტო მესტია კი არა, მთელი საქართველო გლოვობს ლევანს და მზეოს. ძალიან დიდი ტრაგედიაა მომხდარი. რაც იყო აქამდე, ისეთი გზა იყო, რაც მახსოვს სულ ასეთი გზა არის მანდ. ვიწროა ის მონაკვეთი და ორი მანქანა ერთმანეთს გვერდს ვერ აუვლის. ერთი უნდა გაჩერდეს. როგორც ვიცით, ქალბატონი იჯდა საჭესთან, ორნი იყვნენ მანქანაში, ორივე გარდაცვლილია და არავინ იცის რატომ დატრიალდა ეს ტრაგედია. სამწუხაროდ ვერავინ ვერ იტყვის რეალურად, იქ რა მოხდა. ის, რომ იმ ადგილას იქ მათ მანქანა შეხვდა, ეს ცნობილია. შევიწროებული გზა არის ფიზიკურად სხვა ვერ გაივლიდა, შეხვდა მანქანა და ამათ მოუწიათ, ასე ვთქვათ უკანა სვლით წასვლა.
მერე იქ რა მოხდა, უკვე არავინ იცის. წვიმიანი ღამეც იყო, ეს ყველაფერი გასათვალისწინებელია აუცილებლად. ზუსტად არ ვიცი, ხით დატვირთული მანქანა მოდიოდა თუ არა, მაგრამ ფიზიკურად ორი პატარა მანქანაც კი ვერ აუვლის გვერდს ერთმანეთს. ანუ შევიწროებული გზა არის. ყველა ვარიანტში უწევს, რომელიღაცას დათმობა. ამ შემთხვევაში მოუწიათ ამათ იმიტომ, რომ ის მანქანა უკვე მისული იყო იმ შევიწროებულ გზამდე. რა ვერ გათვალა, რა ვერ გაითვალისწინა, ეგ უკვე არავინ იცის.
ავარიის შემდეგ მანქანა ჯერ კიდევ არ ჰქონდა გატაცებული წყალს, რომ ამოიყვანეს და მძღოლის გვერდზე იჯდა ლევანი. ბევრი ვერსია არსებობს. მამაკაცი იმავე დღეს ვიპოვეთ, მზეო მეორე დღეს, მერე გადმოვარდა ეტყობა მანქანიდან და გადმოვასვენეთ ორივე. მართლა დიდი საცოდაობაა, ოთხი ბავშვია დარჩენილი მშობლების გარეშე, დიდი ხანია არ გამიგონია ასეთი დიდი ტრაგედია”, – ამბობს ადგილობრივი.
ambebi.ge
