სპორტისა და ახალგაზრდობის საქმეთა მინისტრი, ლევან ყიფიანი და მინისტრის პირველი მოადგილე, ზურაბ აზმაიფარაშვილი დღეს უნგრელ მოჭადრაკეს იუდიტ პოლგარს შეხვდებიან.
სპორტისა და ახალგაზრდობის საქმეთა სამინისტროს ცნობით, მთაწმინდის პარკში, გუშინ სპორტისა და ახალგაზრდობის საქმეთა მინისტრის პირველი მოადგილის ზურაბ აზმაიფარაშვილის ევროპის საჭადრაკო ფედერაციის საარჩევნო კამპანიის ოფიციალური პლატფორმის წარდგენა მოხდა.
სამინისტროს ცნობით, ლეგენდარული უნგრელი მოჭადრაკე იუდიტ პოლგარი თბილისში სპეციალურად ამ ღონისძიებაზე დასასწრებად ჩამოვიდა.
“აზმაიფარაშვილმა წარადგინა იმ ადამიანთა ნაწილი, ვისთან ერთადაც მომავალ საპრეზიდენტო არჩევნებში იბრძოლებს. არჩევნების წესდების თანახმად, კანდიდატი, რომელიც არჩევნებში მონაწილეობას აპირებს კანდიდატად მხოლოდ გუნდთან ერთად რეგისტრირდება”, – აღნიშნულია სამინისტროს განცხადებაში.
მათივე ინფორმაციით, იუდიტ პოლგარი აზმაიფარაშვილის გუნდის წევრი იქნება.
როგორც სამინისტროში აცხადებენ, ზურაბ აზმაიფარაშვილის საარჩევნო კამპანიის ოფიციალური პლატფორმის წარდგენას ფიდეს პრეზიდენტი კირსან ილუმჟინოვი, საბერძნეთის და მონაკოს ჭადრაკის ფედრაციის პრეზიდენტები დაესწრნენ. ღონისძიებას ასევე დაესწრო საქართველოს ყოფილი პრემიერ-მინისტრი ბიძინა ივანიშვილი და ჭადრაკში მსოფლიო 5-გზის ჩემპიონი მაია ჩიბურდანიძე.
ევროპის ჭადრაკის ფედერაციის არჩევნები 12 აგვისტოს ტრომსოში (ნორვეგია) გაიმართება. პრეზიდენტის პოსტისთვის იბრძოლებს ევროპის ჭადრაკის ფედერაციის მოქმედი პრეზიდენტი სილვიო დანაილოვი. კანდიდატთა დარეგისტრირების ვადა 5 მაისს იწურება.
17.03.14
