საქართველოს უწყებათაშორისი დელეგაციის წევრები ნატო-ს მოახლოებულ სამიტთან დაკავშირებით, დიდ ბრიტანეთში შეხვედრებს მართავენ.
როგორც “თბილისი თაიმს” საგარეო საქმეთა სამინისტროს პრესსამსახურიდან აცნობეს, ვიზიტის ფარგლებში, საგარეო საქმეთა მინისტრის პირველი მოადგილე დავით ზალკალიანი და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის პირველი მოადგილე დავით დონდუა გაერთიანებული სამეფოს საგარეო და თანამეგობრობის სამინისტროს ევროპის და ცენტრალური აზიის დირექტორატის უფროსის მოვალეობის შემსრულებელ სან მაკლეოდს, უსაფრთხოების პოლიტიკის დეპარტამენტის უფროსის მოადგილეს დეივ პროდგერსს და სამხრეთ კავკასიის ჯგუფის ხელმძღვანელ ნილ ფლოიდს შეხვდნენ.
ასევე ქართული დელეგაციის შეხვედრა გაიმართა დიდი ბრიტანეთის პარლამენტის თემთა პალატის წევრთან, საქართველოს საკითხებზე ინტერპარტიული ჯგუფის ხელმძღვანელთან მარკ რეკლესთან და ასევე ლორდთა პალატის წარმომადგენლებთან.
მხარეებმა განიხილეს მიმდინარე წლის შემოდგომაზე დიდ ბრიტანეთში დაგეგმილი ნატო-ს სამიტისთვის მზადების პროცესი და აღნიშნულ სამიტზე საქართველოს მიერ ინტეგრაციულ პროცესში მიღწეული პროგრესის ასახვის შესაძლებლობები.
აღინიშნა ბუქარესტის სამიტის გადაწყვეტილების იმპლემენტაციის დაწყების აუცილებლობა და ამ კონტექსტში საქართველოს მიერ გაწევრიანების სამოქმედო გეგმასთან მიერთების მნიშვნელობა. მხარეებმა ასევე ისაუბრეს თავდაცვის და უსაფრთხოების სფეროში ორ ქვეყანას შორის თანამშრომლობის განვითარების ასპექტებზე.
შეხვედრებისას აგრეთვე განიხილეს საქართველოს ევროკავშირთან ინტეგრაციის პროცესის მიმდინარეობა. განსაკუთრებული ყურადღება დაეთმო ევროკავშირთან ასოცირების შესახებ შეთანხმების, ღრმა და ყოვლისმომცველი თავისუფალი ვაჭრობის შესახებ შეთანხმების ჩათვლით, დროულად ხელმოწერის მნიშვნელობას.
მხარეებმა ასევე ისაუბრეს რეგიონალურ საკითხებზე და უკრაინაში განვითარებულ მოვლენებზე. ხაზი გაესვა, უკრაინის ყირიმის რეგიონში ჩატარებული ე.წ. “რეფერენდუმის” უკანონობას და მის შეუსაბამობას საერთაშორისო და უკრაინული სამართლის ნორმებთან. აღინიშნა ყირიმის ნახევარკუნძულზე სიტუაციის დეესკალაციისა და სამხედრო დაპირისპირების თავიდან აცილებისთვის, უკრაინის სუვერენიტეტის და ტერიტორიული მთლიანობის პატივისცემის აუცილებლობა.
ვიზიტის ფარგლებში, დაგეგმილია შეხვედრების გამართვა გაერთიანებული სამეფოს თავდაცვის სამინისტროში და პარლამენტის თავდაცვის კომიტეტში. ასევე იგეგმება, საგარეო საქმეთა მინისტრის პირველი მოადგილის დავით ზალკალიანის სიტყვით გამოსვლა დიდი ბრიტანეთის საერთაშორისო ურთიერთობების სამეფო ინტიტუტში Chatham House თემაზე “საქართველოს საგარეო პოლიტიკა ახალ რეალობაში”.
დიდ ბრიტანეთში საქართველოს უწყებათაშორისი დელეგაციის: საგარეო საქმეთა უწყებათაშორისი დელეგაციის წევრები არიან: საგარეო საქმეთა სამინისტროს, თავდაცვის სამინისტროს, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის წარმომადგენლები.
18.03.14
