ევროპის საბჭოს ექსპერტების ცნობით, სასჯელაღსრულების სისტემის ჯანდაცვის სფერო მნიშვნელოვნად გაუმჯობესდა. ამის შესახებ მათ მიერ მომზადებულ ანგარიშშია ნათქვამი.
ანგარიში ევროპის კავშირისა და ევროპის საბჭოს ერთობლივი პროგრამის “ადამიანის უფლებები ციხეებსა და დახურული ტიპის სხვა დაწესებულებებში“ ფარგლებში გაკეთდა.
ევროპის საბჭოს ექსპერტებმა საქართველოს სასჯელაღსრულების სისტემაში ჯანდაცვის კუთხით არსებული მდგომარეობა რეფორმის განხორციელების შუალედურ ეტაპზე შეაფასეს, ხოლო მომზადებულ ანგარიშში მიღწეული პროგრესი რეფორმის ამოცანებთან, საერთაშორისო სტანდარტებთან და ევროპის საბჭოს რეკომენდაციებთან მიმართებაში განიხილეს.
ანგარიშის თანახმად სასჯელაღსრულების სისტემის ჯანდაცვის სფერო, განსაკუთრებით 2012 და წინა წლებთან შედარებით მნიშვნელოვნად გაუმჯობესდა.
“პენიტენციური ჯანდაცვის სფეროში სახეზეა შთამბეჭდავი პროგრესი: გაიზარდა ჯანდაცვის ბიუჯეტი; მნიშვნელოვნად შემცირდა პატიმართა რაოდენობა; მოხდა სამედიცინო დეპარტამენტის სრული რეორგანიზაცია ამოცანების შესრულებაზე ორიენტირებული, თანამედროვე, დინამიური მართვის მოდელების გათვალისწინებით; წითელი ჯვრის საერთაშორისო კომიტეტის მხარდაჭერით განხორციელდა პირველადი ჯანდაცვის რეფორმა; გაიხსნა ახალი სამედიცინო ცენტრი; ინტენსიური სახე მიიღო თანამშრომლობამ სამოქალაქო სექტორის საავადმყოფოებთან; წარმატებით დაინერგა ელექტრონული პროგრამა, რომელიც პაციენტების რიგს და რეფერალს არეგულირებს და უზრუნველყოფს მთლიანი პროცესის გამჭვირვალედ წარმართვას, ობიექტურად, სამედიცინო მიზანშეწონილობის საფუძველზე; გაუმჯობესდა სამედიცინო მონაცემების გაცვლის პროცესი; დაიხვეწა კვების სტანდარტი და გაუმჯობესდა კვების ხარისხი”, – აღნიშნულია ანგარიშში
ანგარიშის თანახმად პენიტენციურ სისტემაში არსებული სანიტარული პირობები და აღჭურვილობა სამზარეულოში/კვებისბლოკებში და სასადილო ოთახებშიშესაბამის მოთხოვნებს აკმაყოფილებს .
ანგარიშში დადებითად არის ასევე შეფასებული სასჯელაღსრულებისა და ჯანდაცვის სამინისტროების თანამშრომლობა , ანგარიშის თანახმად , წარმატებული თანამშრომლობის მაგალითებია ვერტიკალური“ სამედიცინო პროგრამების განხორციელება (ტუბერკულოზი, აივ–ინფექცია/შიდსი); C ჰეპატიტის პროგრამის ერთობლივი სამუშაო ჯგუფი; სამედიცინო მონაცემთა დამუშავების უნიფიკაცია; ერთობლივი კომისია, რომელიც ჯანმრთელობის მდგომარეობის გამო პატიმართა გათავისუფლების საკითხებს განიხილავს; სამუშაო ჯგუფი ფსიქიკური ჯანდაცვის მიმართულებით და სხვა.
ექსპერტთა აზრით, ყველა ზემოხსენებულმა ღონისძიებამ ხელი შეუწყო საქართველოს სასჯელაღსრულების სისტემაში ჯანდაცვის პრაქტიკის აშკარა გაუმჯობესებას ევროპის საბჭოსა და წამების საწინააღმდეგო კომიტეტის სტანდარტების შესაბამისად.
ამასთან, როგორც ანგარიშში ექსპერტები აღნიშნავენ, დაინერგა და/ან გაძლიერდა და უფრო ინტენსიურად ხორციელდება ვერტიკალური სამედიცინო პროგრამები სასჯელაღსრულების დაწესებულებებში როგორიცაა: C ჰეპატიტის პროგრამა, ტუბერკულოზის პროგრამა, სუიციდის პრევენციის პროგრამა, მეთადონით დეტოქსიკაციის პროგრამა, აივ ინფექციის პროგრამა და სხვა.
ანგარიშში ასევე მოცემულია შენიშვნები და რეკომენდაციები შესაძლო სამომავლო ნაბიჯებსა და ქმედებებთან დაკავშირებით ისეთ საკითხებზე, როგორიცაა, სანიტარული და ჰიგიენური პირობების მართვა და კონტროლი, სამედიცინო მომსახურების ხარისხის კონტროლის მექანიზმების დანერგვა, გაიდლაინები და პროტოკოლები, უსაფრთხოების სტანდარტები, სამედიცინო პერსონალის პროფესიული განვითარება, ზიანის შემცირების პროგრამები და სხვა.
ანგარიშის შესახებ ინფორმაციას საქართველოს სასჯელაღსრულებისა და პრობაციის სამინისტრო ავრცელებს.
08.05.14
