დარიალის ხეობაში მთის ნაწილის ჩამოშლას მხვერპლი მოჰყვა. სავარაუდოდ სამი ადამიანია დაღუპული. ადგილზე ამჟამად ევაკუაცია მიმდინარეობს. ჩამოწოლილმა მთის მასამ მდინარე თერგი დააგუბა. როგორც რუსთავი 2 –ს მხცეთა მთიანეთის გუბერნატორმა ნუგზარ ყიფიანმა განუცხადა, შემთხვევა საქართველო-რუსეთის საზღვართან ახლოს მოხდა.
მთიდან წამოსულ მასას გადაკეტილი ქვს გვირაბის შესასვლელები, სავარაუდოდ გვირაბის შიგნით მოყოლილია რამდენიმე სატვირთო მანქანა.
როგორც ადგილობრივები აცხადებენ ხეობა ლაფით ივსება და ჩარეცხვა ემუქრება.
“ნეტგაზეთის” ინფორმაციით, დარიალის ხეობაში, რუსეთ-საქართველოს სასაზღვრო პუნქტში მომუშავე მესაზღვრეები და დარიალჰესის მშენებლობაზე დასაქმებული მუშები დარიალის ხეობაში მდებარე მთავარანგელოზთა სახელობის მამათა მონასტერში არიან შეხიზნულები.
ყაზბეგის მუნიციპალიტეტის გამგებელმა შალვა ელოშვილმა განაცხადა, რომ დევდორაკის ხეობიდან წამოსულმა ყინულის მასამ თერგის ხეობა გადაკეტა და ახლა ხერგილი წყლით ივსება:
მისი თქმით, მან არ იცის, თუ რამ გამოიწვია ყინული მასის მოწყვეტა. როგორც ელოშვილი ამბობს, აღნიშნულ ადგილზე მიმდინარეობს დარიალ ჰესის მშენებლობა და ამ მშენებლობის შემადგენელი ნაწილი გვირაბი. ელოშვილი ამბობს, რომ არა აქვს ინფორმაცია, არის თუ არა ეს ფაქტი კავშირში ამ ინფრასტრუქტურულ პროექტთან.
რეგიონული განვითარებისა და ინფრასტრუქტურის სამინისტროს ცნობით, ინციდენტის ადგილას უკვე გაემგზავრა მინისტრის მოადგილე. სტეფანწმინდაში გაემგზავრნენ შს სამინისტროს საგანგებო სტუაციების სამსახურის თანამშრომლებიც.
შალვა ელოშვილის თქმით, აღნიშნულ ადგილზე დასახლებული პუნქტი არ არის და მხოლოდ საზღვრის დაცვის სამსახური და ჰესის მშენენებლობაზე დასაქმებულები იმყოფებიან.
“გახიზნულები არიან ამ სამსახურების წარმომადგენლები უსაფრთხო ადგილას, იქ არის მონასტერი და იმ მონასტრის ტერიტორიაზე არიან”, – განაცხადა ელოშვილმა. მისივე თქმით, ადგილზე მსხვერპლის შესახებ ინფორმაციას არ ფლობს.
17.05.14
