საქართველოს მართლმადიდებელი ეკლესიის წმინდა სინოდმა უცხოეთის ეპარქიებისთვის ოთხი ახალი მღვდელმთავარი შეარჩია, – ამის შესახებ ჟურნალისტებს საპატრიარქოსთან წილკნელმა მიტროპოლიტმა ზოსიმემ განუცხადა.
საპატრიარქოში წმინდა სინოდის სხდომა დასრულდა. სხდომის პირველადი შედეგების შესახებ განცხადება მეუფე ზოსიმემ გააკეთა. მისი თქმით, უმთავრესი საკითხი იყო ის, რომ უცხოეთისათვის ოთხი ახალი მღვდელმთავარი შეირჩა, დანარჩენი იყო უმნიშვნელოვანესი საეკლესიო საკითხები.
ჟურნალისტების კითხვაზე, იმსჯელა თუ არა სინოდმა ანტიდისკრიმინაციულ კანონთან დაკავშირებით, მეუფე ზოსიმემ აღნიშნა, რომ ამასთან დაკავშირებით სინოდმა პატრიარქის განცხადება დაამოწმა და მოიწონა. მღვლდელმთავრმა ასევე უარყო საზოგადოებაში გავრცელებული აზრი პატრიარქის გადადგომის შესახებ და სინოდზე ამ საკითხის განხილვის შესახებ.
განჩინების საბოლოო სრული ტექსტი უახლოეს პერიოდში გახდება ცნობილი.
მიტროპოლიტის თქმით, უცხოეთისათვის დასავლეთ ევროპაში შეირჩა ორი ახალი მღვდელმთავარი, კერძოდ, გერმანია-ავსტრიისა და ჰოლანდია- ლუქსემბურგის ეპარქიებისთვის, ასევე ერთი ახალი მღვდელმთავარი ამერიკისთვის. აგრეთვე კიდევ ერთი მღვდელმთავარი – საინგილოსთვის.
მეუფე ზოსიმეს განცხადებით, გერამანია-ავსტრიის ეპარქიაში არქიმანდრიტი ლაზარე სამარბეგიშვილი ეკურთხება, ჰოლანდიაში იქნება არქიმანდიტრი დოსიფე ბოგვერაძე, ამერიკაში არქიმანდრიტი საბა ინწკირველი და საინგილოში – არქიმანდრიტი დემეტრე თეთრუაშვილი.
მეუფე ზოსიმეს განცხადებით, სინოდის სხდომაზე საქართველოს ეკლესიის პირველი მთავარეპისკოპოსი იოანე წმინდანად იქნა შერაცხული.
დღემდე სულ იყო 43 ეპარქია, პატრიარქის ჩათვლით კი, 45 მღვდელმთავარი.
03.06.14
