ევროკავშირთან ასოცირების ხელშეკრულების ხელმოწერასთან დაკავშირებით, თბილისში დაგეგმილ კონცერტზე მოსახლეობას სიტყვით მიმართავენ საქართველოს პრეზიდენტი გიორგი მარგველაშვილი და პრემიერ-მინისტრი ირაკლი ღარიბაშვილი.
როგორც ჟურნალისტებს მთავრობის ადმინისტრაციის უფროსის მოადგილემ, ნინო კობახიძემ განუცხადა, დღეს, საქართველოს სამთავრობო დელეგაცია ბრიუსელში ჩაიტანს ქართველი ხალხის მთავარ გზავნილს, რომლითაც კიდევ ერთხელ დადასტურდება, რომ საქართველოს ევროპული გზა ჩვენი ურყევი ნებაა.
“სწორედ ამ დღესთან დაკავშირებით 20.30 საათზე ჩვენ გავმართავთ კონცერტს თბილისში, ევროპის მოედანზე. მასში მონაწილეობას მიიღებენ ჩვენი ცნობილი მომღერლები, რომლებიც ევროპაში მოღვაწეობენ, ასევე, ქართველი ვარსკვლავები. დიდი სურვილი გვაქვს, რომ სრულიად საქართველოსთან ერთად გავიზიაროთ ეს დიდი სიხარული, რაც ხელშეკრულების დღეს თან სდევს”, – აღნიშნა ნინო კობახიძემ.
ასოცირების ხელშეკრულების ხელმოწერისადმი მიძღვნილ კონცერტი ორ მოქმედებიანი იქნება.
პირველ ნაწილში მონაწილეობას მიიღებენ ოპერის ქართველი ვარსკვლავები: პაატა ბურჭულაძე, ანიტა რაჭველიშვილი, ნინო სურგულაძე, ლადო ათანელი, გიორგი გაგნიძე. მეორე განყოფილებაში კი – ქართული ესტრადის ვარსკვლავები ნინო ქათამაძე და ჯგუფი “ინსაითი”, ნიაზ დიასამიძე, ანსამბლი “სუხიშვილები”.
28 ივნისს, საქართველოს პრემიერ-მინისტრი ამ დღესთან დაკავშირებით, ბათუმში გამართავს მიღებას დიპლომატიური კორპუსის წარმომადგენლებისთვის.
27.06.14
