სოფლის მეურნეობის მინისტრი ოთარ დანელია და სურსათის ეროვნული სააგენტოს წარმომადგენლები რესტორნების მფლობელებს შეხვდნენ.
როგორც “თბილისი თაიმსს” სააგანტოდან აცნობეს, შეხვედრაზე საუბარი წარიმართა კვების ობიექტებში ღვინისა და მაღალი რისკის შემცველი სურსათის უვნებლობის კონტროლის გამკაცრებაზე, სოფლის მეურნეობის მინისტრმა გამოთქვა მზადყოფნა, მუდმივი კომუნიკაცია და კოორდინაცია ჰქონდეს იმ ბიზნესოპერატორებთან, რომლებიც მზად არიან, იზრუნონ მოსახლეობის უვნებელი სურსათით უზრუნველყოფასა და ასევე საკუთარი ობიექტის რეპუტაციაზე. სურსათის ეროვნული სააგენტო თავის მხრივ, მზად არის, ნებისმიერ ბიზნესოპერატორს გაუწიოს კონსულტაცია, რათა მათ დანერგონ სურსათის უვნებლობის შიდა კონტროლის სისტემები თავიანთ საწარმოებში. სურსათის ეროვნული სააგენტოს წარმომადგენლებმა რესტორნების მფლობელებს გააცნეს რძისა და რძის პროდუქტების ტექნიკური რეგლამენტი, მიკვლევადობის პროცედურებთან დაკავშირებული საკითხები, სურსათის უვნებლობის შიდა საწარმოო კონტროლის პროცედურები (HACCP), ბიზნესოპერატორის აღიარების წესი, რომელიც 2015 წლის იანვრიდან შედის ძალაში. შეხვედრის მონაწილეები შეთანხმდნენ, რომ შეხვედრებს რეგულარული სახე მიეცემა. სურსათის ეროვნული სააგენტოს უფროსმა შესთავაზა ბიზნესოპერატორებს, შექმნან გაერთიანება, რომელიც მჭიდროდ ითანამშრომლებს სურსათის ეროვნულ სააგენტოსთან შექმნილ “სამოქალაქო დარბაზთან”, რომლის შემადგენლობაში შედიან ექსპერტები, მეცნიერები და არასამთავრობო სექტორის წარმომადგენლები. 19.09.14
