2018 წლის მსოფლიო 44-ე საჭადრაკო ოლიმპიადას ბათუმი უმასპინძლებს. ეს გადაწყვეტილება ნორვეგიის ქალაქ ტრომსოში, ფიდეს გენერალური ასამბლეის დელეგატებმა კენჭისყრის შედეგად მიიღეს.
ბათუმთან ერთად ოლიმპიადის მასპინძლობა სამხრეთ აფრიკის ქალაქ კეიპტაუნსაც სურდა. ბათუმს 93-მა დელეგატმა დაუჭირა მხარი, კეიპტაუნს კი, 51-მა.
ევროპის საჭადრაკო ფედერაციის პრეზიდენტის, ზურაბ აზმაიფარაშვილის თქმით, საქართველომ უმნიშვნელოვანესი ტურნირის მასპინძლობის უფლება მოიპოვა.
“უღრმეს მადლობას მოვახსენებ ფიდეს დელეგატებს, რომ დაგვიჯერეს და გვენდნენ. ჩვენ უნდა გავაკეთოთ ყველაფერი იმისთვის, რომ ჩვენი ოლიმპიადა მსოფლიოს დავამახსოვროთ ჩვენი სტუმართმოყვარეობით”, – აღნიშნა აზმაიფარაშვილმა.
საქართველოს საჭადრაკო ოლიმპიადისთვის არასდროს უმასპინძლია. ოლიმპიადას ამ დროისთვის ტრომსო მასპინძლობს, შემდეგი ოლიმპიადა კი 2016 წელს ბაქოში ჩატარდება.
14.08.14
