თბილისის მერი, გიგი უგულავა მერიის უსაფრთხოების სამსახურის იმ თანამშრომელს შეხვდა, რომელმაც საპატრულო პოლიციის თანამშრომლებთან ერთად, დიდუბის რაიონის გამგეობის შენობის წინ მომხდარი ინციდენტის თავიდან აცილება შეძლო.
მერიის ინფორმაციით, გიგი უგულავამ მას დაკისრებული მოვალეობის ეფექტურად შესრულებისთვის მადლობა გადაუხადა.
ინციდენტი გუშინ გამგეობასთან მოხდა. შენობის წინ შეიარაღებული პიროვნება დაფიქსირდა, რომელსაც ხელში საეჭვო ნივთები ეჭირა. ადგილზე მივიდა საპატრულო პოლიცია, რომლებმაც მერიის უსაფრთხოების სამსახურის თანამშრომელთან ერთად, აღნიშნული პიროვნებისთვის იარაღის ჩამორთმევა და მისი დაკავება შეძლეს.
დაკავებამდე შეიარაღებულმა პირმა ორი გასროლა განახორციელა, რასაც მსხვერპლი არ მოჰყოლია. გამოძახებული იყო ასევე გამნაღმველთა ჯგუფი და დადგინდა, რომ დაკავებულის კუთვნილ პოლიეთილენის პარკში ასაფეთქებელი ნივთიერება არ არსებობდა.
დაკავებული საგამოძიებო უწყებაში გადაიყვანეს და მიმდინარეობს საქმის გამოძიება. არსებული ინფორმაციით, აღნიშნული პიროვნება მიმდინარე წელს ამნისტიის შედეგად გათავისუფლდა.
15.05.13
