კონკურსის ფარგლებში “სტუდენტები სოციალური მეწარმეობის მხარდასაჭერად”, თბილისის 4 უნივერსიტეტს შორის იყო საქართველოს საპატრიარქოს წმიდა ანდრია პირველწოდებულის სახელობის ქართული უნივერსიტეტი, სადაც 23 ოქტომბერს შიდა შესარჩევი პრეზენტაცია შედგა.
პროექტი „სტრატეგიული კვლევებისა და განვითარების ცენტრის“ პარტნიორობით „ევრაზიის თანამშრომლობის ფონდთან” ერთად ხორციელდება.
კონკურსის მთავარი მიზანია ახალგაზრდებში სოციალური მეწარმეობის კონცეფციის პოპულარიზაცია და მასში სტუდენტების აქტიური ჩართვა.
პროექტი საინტერესო იყო აქტიური და შემოქმედებითი აზროვნების მქონე სტუდენტებისთვის, რომელთაც საშუალება ეძლეოდათ ცოდნა გაეღრმავებინათ, ინტერესთა სფერო გაეფართოებინათ, ახალი პრაქტიკული უნარები და გამოცდილება შეეძინათ და საინტერესო ორგანიზაციებს დაკავშირებოდნენ.
კონკურსის ფარგლებში ჩატარდა შემდეგი ღონისძიებები: ერთდღიანი სემინარები, რომლებიც ინტერაქტიული ხასიათის იყო და სტუდენტებმა მიიღეს ინფორმაცია სოციალური მეწარმეობის კონცეფციასთან დაკავშირებით, რომელიც ამ სფეროში ქართული და უცხოური გამოცდილების წარმატებული მაგალითებით იყო გამდიდრებული. ასევე თითოეულ მონაწილე უნივერსიტეტში, სამოტივაციო წერილის საფუძველზე16 სტუდენტი შეირჩა და 4 ჯგუფი ჩამოყალიბდა, რომელთათვისაც მოეწყო ტური, სადაც ისინი გაეცნენ საქართველოში მოქმედ სოციალურ საწარმოებს, მათ მიზნებს, საქმიანობას და პრობლემებს, რომლებსაც ისინი მუშაობის პროცესში აწყდებიან. ამის შემდეგ, ქართული უნივერსიტეტის 16-კაციანმა ჯგუფმა მიიღო საკონკურსო დავალება, კერძოდ, მათ კაფე Doctor’s House-ის ბიზნეს-სტრატეგიის შემუშავებაზე უნდა ემუშავათ, რომელიც ლეიკემიით დაავადებულ ბავშვებს ეხმარება.
როგორც აღვნიშნე, ქართულ უნივერსიტეტში შიდა შესარჩევი ტური შედგა 23 ოქტომბერს, სადაც წარმოდგენილნი იყვნენ შემდეგი გუნდები: “ჯობსის შვილები” _ მიხეილ სეხნიაშვილი, გიორგი შარიქაძე, მეგი ბალახაშვილი და ვახტანგ აბაშიძე; “Brain Power” – გიორგი დარსაველიძე, თეონა იაკობაშვილი, მაცაცო ალიბეგაშვილი და ნუცა სვიმონიშვილი; “Soccreative” – სოფიკო წულუკიძე, სალომე გველესიანი, სოფიკო წიკლაური და გიორგი კახაძე; „Students for Children”- ლაშა ქარელი, დავით გოგოლაშვილი, ლევან კიკილაშვილი და შოთა შარაშენიძე; თითოეულმა გუნდმა ჟიურის წარუდგინა თავისი პრეზენტაცია, რომლის დროსაც გაიჟღერა მრავალმა საინტერესო იდეამ. ჟიურის გადაწყვეტილებით, გამარჯვებული გუნდი გახდა _ “Brain Power”, ხოლო მეორე ადგილზე გავიდა – „Soccreative”. თითოეულ მონაწილეს კონკურსში მონაწილეობის დამადასტურებელი სერთიფიკატი გადაეცა.
“ სტუდენტებისთვის ძალიან საინტერესო და სასარგებლო იყო პროექტზე მუშაობის პროცესი. მათ დიდი გამოცდილება შეიძინეს და რაც მთავარია, გაუჩნდათ სტიმული, ჩაერთონ მრავალ ასეთ საინტერესო კონკურსსა თუ პროექტში. მინდა მივულოცო და წარმატება ვუსურვო გამარჯვებულ გუნდს და თითოეულ მონაწილეს, რომელთაც თავიანთი მნიშვნელოვანი წვლილი შეიტანეს პროექტის განვითარებაში”. – განაცხადა ქართული უნივერსიტეტის სტუდენტური თვითმმართველობის პრეზიდენტმა, ნოდარ ვაწაძემ.
თამარ მამადაშვილი
Discussion about this post