განსახლებისა და დევნილთა მინისტრი სოზარ სუბარი თავდაცვის მინისტრის მინდია ჯანელიძის გადადგომის მოთხოვნას აბსურდულს უწოდებს და აღნიშნავს, რომ ეს საკითხი არ განიხილება.
„თავდაცვის სამინისტრომ არასწორი განცხადების გამო ბოდიში მოიხადა. ამ ყველაფერს პრემიერმაც მისცა შეფასება. რაც შეეხება გადადგომის საკითხს, ეს არის აბსურდი, განსაკუთრებით მაშინ, როცა იმ ოპოზიციური ძალისგან მოდის, რომელმაც მისი მმართველობის 9 წლის განმავლობაში ვერ შეძლო თავიდან აეცილებინა ომი. უფრო მეტიც, ომი 2 დღეში წააგო და შემდეგ რუსთაველზე კონცერტი გამართა ვითომ გამარჯვების და ამ დროს დაკარგული ტერიტორიების აღსანიშნავად. მოთხოვნა ისმის იმ ძალისგან, რომლის მთავარსარდალიც ტალახსა და მტვერში ფორთხავდა და ქართველი ხალხისთვის ბოდიში არ მოუხდია, რომლის თავდაცვის მინისტრებიდან ერთი ძებნილია, ერთი ციხეში ზის და ერთი კი დაჭერას ძლივს გადაარჩინეს. თავდაცვის მინისტრის შეცვლის საკითხი არც მთავრობის დღევანდელ სხდომაზე, არც ხვალ და არც ზეგ არ განიხილება“, – განაცხადა სუბარმა.
24.12.14
