22 იანვარს UNESCO-ს შტაბ-ბინაში გაიმართა ქართველი პიანისტის ელისო ბოლქვაძისთვის „UNESCO-ს ხელოვანი მშვიდობისთვის“ ტიტულის მინიჭების ოფიციალური ცერემონია. აღსანიშნავია, რომ ელისო ბოლქვაძის კანდიდატურა UNESCO-ს წარედგინა საქართველოს საგარეო საქმეთა სამინისტროს მიერ. როგორც “თბილისი თაიმსს” საგარეო უწყებიდან აცნობეს, ცერემონიაზე სტუმრებს სიტყვით მიმართა UNESCO-ს გენერალურმა დირექტორმა ქ-მა ირინა ბოკოვამ, რომელმაც ისაუბრა საქართველო-UNESCO-ს ნაყოფიერ თანამშრომლობაზე და ხაზი გაუსვა იმ ფაქტს, რომ 2015 წელს UNESCO-ს მონაწილეობით აღინიშნება ქართველი პოეტის აკაკი წერეთლისადმი მიძღვნილი იუბილე. დამსწრეებს სიტყვით მიმართეს ასევე საფრანგეთის რესპუბლიკაში საქართველოს საგანგებო და სრულუფლებიანმა ელჩმა, საქართველოს მუდმივმა წარმომადგენელმა UNESCO-ში ეკატერინე სირაძე-დელონემ და ელისო ბოლქვაძემ. ღონისძიებას ესწრებოდნენ UNESCO-ს გენერალური დირექტორის მოადგილეები და სხვა ხელმძღვანელი პირები. ასევე საფრანგეთში აკრედიტებული ელჩები, UNESCO-ში მუდმივი წარმომადგენლები და პარიზში მცხოვრები ქართველი ხელოვანები და დიასპორის წარმომადგენლები. ცერემონიის დასასრულს გაიმართა ოფიციალური მიღება საფრანგეთის რესპუბლიკაში საქართველოს საელჩოს სახელით. „UNESCO-ს ხელოვანები მშვიდობისთვის“ არიან კულტურის დარგში მოღვაწე გამოჩენილი პიროვნებები, რომლებიც მზად არიან უსასყიდლოდ გამოიყენონ საკუთარი სახელი და სტატუსი ორგანიზაციის ღირებულებებისა და მთავარი მიზნების პოპულარიზაციისთვის. ეს არიან ის ადამიანები, ვინც თავისი წარმატებული კარიერის განმავლობაში უკვე დიდი წვლილი შეიტანეს იუნესკოს კომპეტენციაში არსებული სფეროების განვითარებაში. ელისო ბოლქვაძისთვის ამ მაღალი სტატუსის მინიჭების საფუძველი გახდა არა მარტო მისი პროფესიონალიზმი, არამედ წლების განმავლობაში გაწეული აქტიური საქველმოქმედო მოღვაწეობა მსოფლიოს სხვადასხვა კუთხეში, განსაკუთრებით კი ახალგაზრდა ნიჭიერი მუსიკოსების მხარდაჭერა ფონდ „ლირას“ მეშვეობით. 23.01.15
