საქართველოს რეგიონული განვითარებისა და ინფრასტრუქტურის სამინისტროს შპს “სახელმწიფო სამშენებლო კომპანია” სარფში სანაპირო ზოლზე ნაპირსამაგრ და ქვისცვენის საწინააღმდეგო სამუშაოებს ახორციელებს.
ადგილზე არსებულ სამუშაოებს დღეს, საქართველოს რეგიონული განვითარებისა და ინფრასტრუქტურის მინისტრის პირველი მოადგილე გიორგი ამაშუკელი და შ.პ.ს. „სახელმწიფო სამშენებლო კომპანიის“ დირექტორის მოადგილე ირაკლი კუპრავა გაეცნენ.
სამინისტროს ინფორმაციით, პროექტის ფარგლებში, სარფის სანაპიროს მთელ სიგრძეზე შენდება 7,9 მეტრი სიმაღლისა და 3,3 მეტრი სისქის ქვანაყარი ბერმა და მაგრდება 10-ტონიანი 8500 ტეტრაპოდი, ასევე გზის 932 მეტრიან კლდოვან ნაწილზე სპეციალური დამცავი ბადე კეთდება. სარფის ნაპირგამგარების პროექტს სახელმწიფო ბიუჯეტი აფინანსებს და მისი ღირებულება 45 მილიონ ლარს შეადგენს. პროექტის დასრულება წელს იგეგმება. სამუშაოებზე დასაქმებულია 300 ადამიანი, ძირითადად – ადგილობრივი მცხოვრებლები. აღსანიშნავია ისიც, რომ ნაპირგამაგრებისას გამოყენებული მასალა, ტეტრაპოდები 100%-ით ადგილობრივი წარმოებისაა. საერთაშორისო მნიშვნელობის სენაკი-ფოთი-სარფის საავტომობილო გზაზე, დღე-ღამეში, საშუალოდ, 15.000 მანქანა მოძრაობს, შტორმული ტალღების ზემოქმედების შედეგად კი, გზის ქვედა ფერდი ირეცხება, რაც მის მდგრადობას უქმნის საფრთხეს, შესაბამისად – მასზე მოძრავ ტრანსპორტსა და მგზავრებს. პრობლემას წარმოშობს ინტენსიური ქვისცვენაც. ციცაბო ფერდობებიდან ლოდები წელიწადის ყველა დროს ერთნაირი ინტენსივობით იყრება და ხშირია მგზავრების, მანქანებისა და ტვირთების დაზიანების შემთხვევები. სანაპირო ზოლის გამაგრების, მოწყობისა და ქვისცვენის საწინააღმდეგო ბადის დამაგრების შედეგად, ტერიტორია დაცული და უსაფრთხო გახდება როგორც ადგილობრივი მოსახლეობის, ისე საერთაშორისო გადამზიდავებისა და უცხოელი მგზავრებისთვის.
