თბილისის მერი დავით ნარმანია სამუშაო ვიზიტით პორტუგალიაში გაემგზავრა.
მერიის პრესსამსახურის ინფორმაციით, ვიზიტის ფარგლებში, დავით ნარმანია ქალაქ პორტოს მერს ლუი მორიერას შეხვდება. შეხვედრაზე განიხილება მერიის ადმინისტრაციული მოწყობის, ურბანული განვითარების – ძველი და ახალი ქალაქის შერწყმის, სამრეწველო და ტურიზმის განვითარების საკითხები.
6 თებერვალს დავით ნარმანია ქალაქ მატოზინიუში მონაწილეობას მიიღებს ევროსაბჭოს ადგილობრივ თვითმმართველობათა კონგრესის მონიტორინგის მუდმივმოქმედი კომიტეტის შეხვედრაში. შეხვედრაზე, რომელსაც კომიტეტის თავმჯდომარე ფილიპ რესევორი გახსნის, დაგეგმილია მონიტორინგის კომიტეტის საქმიანობის შეფასება. მონიტორინგის კომიტეტის წევრები ასევე იმსჯელებენ წინასამონიტორინგო ღონისძიებების შესახებ საქართველოში, უკრაინასა და პორტუგალიაში.
შეხვედრაზე აგრეთვე გაკეთდება მოხსენებები თემაზე – ადგილობრივი და რეგიონული დემოკრატია ევროპაში, ადგილობრივი თვითმმართველობის შესახებ ევროპული ქარტიის შესაბამისობა წევრ ქყეყნებთან მიმართებით. გარდა ამისა, შეხვედრაზე გაკეთდება მოხსენება თემაზე „ადამიანის უფლებები ადგილობრივ და რეგიონულ დონეებზე“.
თბილისის მერი პორტუგალიაში ვიზიტს 7 თებერვალს დაასრულებს.
