ტექნიკური სამუშაოების დასრულების შემდეგ რუსეთმა გერმანიაში „ჩრდილოეთის ნაკადი 1“-ის მეშვეობით გაზის მიწოდება განაახლა. Spiegel-ის ცნობით, ამის შესახებ ოპერატორი კომპანია Nord Stream AG-ის წარმომადგენელი იტყობინება.
კომპანიის ინფორმაციით, გაზის მიწოდება იმავე მოცულობით ხორციელდება, რაც ტექნიკური სამუშაოების დაწყებამდე იყო – დაახლოებით 67 მილიონი კუბური მეტრი დღეში. ეს გაზსადენის მაქსიმალური სიმძლავრის 40%-ს შეადგენს.
10 ივლისს კანადა დათანხმდა, გერმანიაში დააბრუნოს გაზსადენ „ჩრდილოეთის ნაკადის“ ტურბინა, რომელიც კანადაში გასარემონტებლად ჩაიტანეს, თუმცა, რუსეთისთვის დაწესებული სანქციების გამო, მას უკან ვერ აბრუნებდნენ.
„ჩრდილოეთის ნაკადი 1“ არის გაზსადენის ქსელი, რომლითაც გერმანიას რუსეთიდან გაზი მიეწოდება. ტურბინა, რომელიც კანადაში, Siemens Energy AG-ის მიერ არის შექმნილი, სარემონტოდ, მონრეალში იყო გაგზავნილი.
„ჩრდილოეთის ნაკადი 1“ Nord Stream AG-ს ეკუთვნის, რომლის ძირითადი აქციონერი რუსული სახელმწიფო კომპანია „გაზპრომია“.
