“კანონის ინტერპრეტაციაზე საუბარი იმ შემთხვევაში იქნება შესაძლებელი, თუ კომისიას ექნება სრულყოფილი ინფორმაცია, თუ რას აპირებს მაესტრო, იმედი და GDS გაერთიანების შემთხვევაში. ჯერჯერობით არანაირი ოფიციალური დოკუმენტაცია შემოსული არ არის”. ამის შესახებ საქართველოს კომუნიკაციების ეროვნული კომისიის თავმჯდომარემ ვახტანგ აბაშიძემ “რუსთავი 2”-ზე, გადაცემა “კურიერის” ეთერში ისაუბრა.
“პირს უფლება აქვს, ფლობდეს არაუმეტეს ერთ საერთო საეთერო სატელევიზო არხს და ერთ საერთო საეთერო რადიოარხს. ეს არის ჩანაწერი მაუწყებლობის შესახებ კანონის 2004 წლის ვერსიაში, მაშინ სიხშირული რესურსი შეზღუდული იყო. დღევანდელი მოცემულობა სხვაა. ტელემაუწყებლებს არ აქვთ ვალდებულება ამა თუ იმ ტრანზაქციაზე კომისიისგან წინასწარი თანხმობა მიიღონ . გარიგების დეტალები გარიგების დადების შემდეგ 10 დღის ვადაში უნდა მოგვაწოდონ. მხოლოდ ამის შემდეგ, სრულყოფილი დოკუმენტაციის არსებობის პირობებში შეგვეძლება მსჯელობა.
არანაირი შეზღუდვა არ არსებობს თუ ერთი პირის მფლობელობაში მყოფი არხები ერთიანდება და ისინი ვრცელდება სატელიტით, საკაბელო ტელევიზიით ან ინტერნეტ ქსელებით. ეთადერთი ნიუანსი არის სიხშირეების გამოყენებით მაუწყებლობის შემთხვევაში. თუ რომელიმე არხის სპეციალიზებულ მაუწყებლად გარდაქმნას აპირებენ , სანამ გარდაქმნიან მანამ უნდა მომართონ კომისიას და კომისიამ მათ ავტორიზაციაში შეიტანოს ცვლილება,”-განაცხადა ვახტანგ აბაშიძემ.
მანანა ღოღობერიძე
