ტუნისში, სადაც ანტიტერორისტული ოპერაციის დროს 22 ადამიანი დაიღუპა და 50-მდე დაიჭრა, ქართველი მეზღვაურები და ბათუმის ბავშვთა ანსამბლი დაახლოებით 100 კაციანი შემადგენლობით იმყოფება. ქორეოგრაფიულ ანსამბლ “მთაწმინდას” ხელმძღვანელი განმარტავს, რომ მათ საფრთხე არ ემუქრებათ და გემმა პორტი დღეს უნდა დატოვოს.
“საშიში არაფერია. ტერაქტის შესახებ ჩვენც გავიგეთ, შემდეგ გვქონდა სოლო კონცერტი, ჩვეულებრივად მიდის ცხოვრება. ხვალ მთელი დღე და ღამე გემი იქნება ზღვაში და ამიტომ შეიძლება, დაკავშირდება ვერ მოხერხდეს. დამიკავშირდა აჭარის კულტურის სამინისტროდან წარმომადგენელი და გვკითხა, ეცნობებინა თუ არა საგარეო საქმეთა სამინისტროსთვის ჩვენ შესახებ. მე მგონი, ამის საჭიროება არ არის. მშვიდად მიმდინარეობს ყველაფერი”, – აცხადებს ანსამბლის ხელმძღვანელი ქეთი ბოლქვაძე.
ამასთან, როგორც საქართველოს საგარეო საქმეთა სამინისტროს სპიკერი დავით კერესელიძე აცხადებს, ტუნისში მეზღვაურებისა და ანსამბლის წევრების ყოფნის შესახებ ინფორმაციას ფლობენ.
“ჩვენ ვიცით, რომ მთელი ჯგუფი იმყოფება გემბანზე, უსაფრთხოების თვალსაზრისით იცავენ ადგილობრივი სამართალდამცავები, მათ უსაფრთოებას არაფერი ემუქრება. იქ არიან მეზღვაურები, ჩვენი ელჩი ჩადის ტუნისში და იქნება შეხვედრები როგორც მეზღვურებთან, ასევე ყველა იმ ადამიანთან ვისთანაც ეს იქნება საჭირო”, – განაცხადა დავით კერესელიძემ.
აღნიშნულ ინფორმაციას “რუსთავი 2” ავრცელებს.
ტუნისში, ბარდოს მუზეუმში მძევლების გათავისუფლების ოპერაციის დროს 22 ადამიანი დაიღუპა და 50-მდე დაიჭრა.
