არავისთვის საიდუმლო აღარ არის რომ, ქართული ბაზარი სავსეა გენმოდიფიცირებული ინგრედიენტების შემცველი საკვები პროდუქტით. მოსახლეობის შეძლებული ნაწილი ცდილობს იკვებოს ნატურალური ხორცით, პურით, ხილით, ბოსტნეულით და ა.შ.
სამწუხარო რეალობაა რომ, საქართველოს მოსახლეობის უდიდესი ნაწილი მინიმალური შემოსავლებით ცხოვრობს, ნაწილს კი საერთოდ სამადლოდ ინახავენ. ამგვარ სიტუაციაში დიდი გასაქანი აქვს მითს იმის შესახებ რომ, ორგანული პროდუქტის წარმოება ძვირადღირებული სიამოვნებაა და ჩვენი ტიპის ქვეყანაში მასზე აქცენტირებამ შეიძლება შიმშილი გამოიწვიოს.
ჩვენს ქვეყანაში დამკვიდრდა არასწორი შეხედულება, რომ თითქოსდა, ბიოწარმოების თვითღირებულება უფრო მაღალია ვიდრე „ქიმიურის“, შესაბამისად ნატურალური პროდუქტი ბევრად მეტი ღირს მაღაზიებში, განსაკუთრებით თუ ის იმპორტირებულია (ანუ უმრავლესობა). შესაბამისად, მივიღეთ მოცემულობა სადაც ეკო პროდუქტის წარმოება მეტად მარჟინალურია.
ბიოორგანულ ბაზარზე დიდი გავლენა შეუძლია იქონიონ ადგილობრივმა ფერმერულმა მეურნეობებმა, თუმცა დღეს სახეზე გვაქვს დაბალეფექტური შრომის ორგანიზაცია, მოძველებული ტექნოლოგიები და მცირემიწიანი ფერმერების ერთობლივი მოქმედების დეფიციტი.
მარტივი მაგალითი შემიძლია მოგიყვანოთ: თუ თქვენ და თქვენი მეზობელი აწარმოებთ თითო ტონა მწვანილს და ბაზარზე მისი ტრანსპორტირება გიჯდებათ პირობითად 100 ლარი, ერთად ტრანსპორტირების შემთხვევაში დაზოგავთ 50 ლარს, რაც დადებითად აისახება საბოლოო ფასზე.
მოძველებული ტექნიკური საშუალებები, ცოდნისა და ინფორმაციის დეფიციტი, არასწორი ლოჯისტიკა იწვევს მცირემიწიან მეურნეობებში წარმოებული პროდუქტის სიძვირეს.
2014 წელს უმსხვილესმა საცალო ვაჭრობის ქსელმა Walmart-მა დაიწყო ორგანული პროდუქტის პროექტი-სადაც ნატურალური პროდუქტის ფასი უფრო დაბალია, ვიდრე „ქიმიურის“.
ინტენსიური ორგანული სასოფლო-სამეურნეო წარმოება, უფრო მაღალტექნოლოგიური, ინოვაციური და იაფია!
სინთეტიკური და ნატურალური წარმოებისთვის პროდუქტის ფასი ერთი სახის დანახარჯებით ყალიბდება: ხელფასი, საწვავი-საცხები მასალები, ამორტიზაცია, მცენარეთა დაცვის და განოყიერების (მცენარეთა კვების) საშუალებები. თუ გაყვებით მუხლობრივად და მოიძიებთ ინფორმაციას მიხვდებით რომ, მექანიზაციაში, მაგალითად ნიადაგის დამუშავების მეთოდის შეცვლით, ნატურალური წარმოება თანხებს გიზოგავთ. მცენარეთა დაცვის და განოყიერების ბუნებრივი საშუალებები გაცილებით იაფია ვიდრე ქიმიური პრეპარატები, განსაკუთრებით თუ ის შემოტანილია და ა.შ.
სწორედ ამ ყველაფრის დათვლით და სწორი ორგანიზებით გახდა წარმატებული Walmart-ის ორგანული პროდუქტის პროექტი.
დღეს განვითარებულ ქვეყნებში (ა.შ.შ, კანადა, ევროკავშირი) აქცენტი სწორედ ეკოლოგიურად სუფთა პროდუქტის წარმოებაზეა გადატანილი.
თუმცა იმის გამო რომ, სასოფლო-სამეურნეო წარმოება დასავლეთში გაცილებით დამოკიდებულია „ქიმიურ“ წარმოებაზე, სრულად ორგანულ წარმოებაზე გადასვლა დიდ პრობლემებთანაა დაკავშირებული და გარკვეულ დროს მოითხოვს (მაგალითად ევროკავშირის სოფლის მეურნეობის პროდუქციის მწარმოებელი, ერთერთი უმსხვილესი ქვეყანა საფრანგეთი, პესტიციდების 25 %-ით შემცირებას გეგმავს 2020 წლისთვის და 50 %-ით 2025 წლისთვის).
საქართველოში ამ მხრივ უკეთესადაა საქმე (ჩვენი ეკონომიკური ჩამორჩენილობის გამო) და თუ სტრატეგია სწორედ იქნა შერჩეული მსოფლიო ბაზარზე შესაძლებელი გახდება თავი დავიმკვიდროთ-ორგანული პროდუქციით.
საწყის ეტაპზე მასშტაბური სტრატეგიის შექმნამდე საჭიროა სახელმწიფომ ხელი შეუწყოს იმ მწარმოებლებს რომლებიც აწარმოებენ: მცენარეთა დაცვის და განოყიერების ორგანულ საშუალებებს, ორგანულ პროდუქტს, ხელი შეუწყოს განათლებას და ინფორმაციის გავრცელების დარგობრივ საშუალებებს, რომლებიც ნიადაგს მოამზადებენ ორგანული წარმოების სტრატეგიის განხორციელებისთვის!
მალხაზ ხაზარბეგიშვილი
აგროკავკასიის ( http://agrokavkaz.ge/ ) მთავარი რედაქტორი
