საქართველოს ზოგიერთ ტურისტულ კომპანიაში საზაფხულო კურორტებზე შეკვეთები უკვე დაწყებულია, „თბილისი თაიმსი“ დაინტერესდა როგორია ტურისტული კომპანიების მოლოდინი.
გამოიკითხა 11 ტურისტული კომპანია. გამოკითხვის შედეგებმა აჩვენა, რომ ყველაზე მოთხოვნადი ქვეყნები კვლავ – ეგვიპტე, თურქეთი და დუბაია.
თუ რომელი ქვეყნებიდან ელოდებიან კომპანიები ტურისტების ნაკადს, უნდა ველოდოთ თუ არა კომპანიების მხრიდან ფასებზე ცვლილებებს, რომელია საქართველოს ის კურორტები სადაც უცხოელი ტურისტები ხშირად ისვენებენ, ბლიც-გამოკითხვის შედეგებიდან შეიტყობთ.
Go Tour – “საქართველოს კურორტებზე სეზონი უკვე მაისის დასაწყისიდან აქტიურ ფაზაში შედის. თან ამ პერიოდში დსთ-ს ქვეყნებში დასვენებებია და ტურისტები აქტიურად ჩამოდიან. იმედია ტურისტების ნაკადი შარშანდელთან შედარებით არ შემცირდება, წინასწარი დაინტერესება და რამოდენიმე დადასტურებული ტური უკვე აქვს ჩვენს კომპანიას უკრაინიდან და ისრაელიდან. მომსახურება უკვე გაძვირებულია, იმ სასტუმროებს, გიდებს, რომლებსაც წინა წლებში ლარებში ჰქონდათ დაფიქსირებული ფასები, ყველა დოლარში აფიქსირებს, რაც თავისთავად უკვე ზრდის ტურის თვითღირებულებას.ადგილობრივების მოთხოვნა გარე ტურებზე ყველაზე დიდია თურქეთის საზღვაო კურორტებზე, როგორიცაა ანტალია, კუშადასი, ბოდრუმი, მარმარისი, ასევე დიდი მოთხოვნაა ეგვიპტის კურორტებზე, ყველაზე ხელსაყრელი ფასიდან გამომდინარე, არის მოთხოვნები ევროპის ქვეყნებშიც, როგორიცაა: საფრანგეთი, იტალია, ესპანეთი, უნგრეთი.ჩვენი კომპანიის შემთხვევაში, ძირითადი მოთხოვნა არის კულტურულ ტურებზე, რაშიც არ შედის საზღვაო კურორტები. მთაზე უფრო აკეთებენ აქცენტს, ვინაიდან, თავიანთი ქვეყნებიდან მაგალითად ბათუმში დასვენება უფრო ძვირი უჯდებათ ვიდრე თურქეთის ან აზიის ქვეყნების საზღვაო კურორტებზე.”
გუდ თრეველი – „ჩვენთან სეზონი ძირითადად საქართველოს მასშტაბით მაისიდან იწყება. შაბათ-კვირას უკვე დავიწყეთ ტაო-კლარჯეთის ტურით. ველოდებით ტურისტების შემოსვლას სხვადასხვა ქვეყნიდან. გაფორმებული გვაქვს კონტარქტი უკრაინასა და სლოვაკეთთან. ფასებიც სავარაუდოდ არ გაძვირდება. ადგილობრივებისთვის ძირითადი მოთხოვნადი ტურისტული ქვეყნებია: ზაფხულობით – თურქეთი, ეგვიპტე, ხოლო ზამთარში – დუბაი და ეგვიპტე. უცხოელი ტურისტები კი უპრიტესობას საქართველოს მთიან რეგიონს ანიჭებენ.”
კალიფსო თრეველი– “ჩვენთან ტურები ყოველთვის არის, გააჩნია სეზონს. ძირითადად რუსულენოვანი ქვეყნების შემოსვლას ველოდებით, ფასებიც რა თქმა უნდა მცირედით გაძვირებული გვაქვს. გარე ტურებზე მოთხოვნადი და პოპულარული ტურისტული ქვეყნები ადგილობრივებისთვის – დუბაი ეგვიპტე და თურქეთია. რაც შეეხებათ უცხოელ ტურისტებს, გაზაფხულზე უფრო მთიანი რეგიონების ტურებს ირჩევენ.”
ვორლდ თრეველი – “საქართველოს კურორტებზე, ტურისტული ტურები პრაქტიკულად მარტის შუა რიცხვებიდან დავიწყეთ. ამ ეტაპისთვის, ფასების მხრივ ვცდილობთ სტაბილურობა შევინარჩუნოთ. ადგილობრივებისთვის აქტუალური ტურისტული ქვეყნები – ეგვიპტე და თურქეთია. უცხოელი ტურისტებისთვის კი, გააჩნია სეზონს, საქართველოს მთიან რეგიონს აირჩევენ თუ საზღვაო კურორტს.”
ნეს თრეველი – “ტურისტული ტური აპრილიდან დავიწყეთ, უცხოელ ტურისტების შემოსვლას ისრაელიდან ველოდებით. რაც შეეხება ფასებს, ეს უკვე სასტუმროებზეა დამოკიდებული გააძვირებენ თუ არა მომსახურებას. ჩვენ შემომყვანი ტურები გვაქვს, ტურისტები აქცენტს ისეთ მთიან კურორტებზე აკეთებენ როგორებიცაა – ბაკურიანი გუდაური და ახალციხე.”
მაიფლაი – “საქართველოს კურორტებზე ტურისტულ სეზონს აპრილის ბოლოდან ვიწყებთ და ოქტომბრის ბოლომდე გრძელდება. ძირითადად შემომსვლელ ტურისტებს, რუსეთიდან უკრაინიდან და პოლონეთიდან ველოდებით. ყველაზე მოთხოვნადი გარე ტურისტული ქვეყნებია – ესპანეთი, იტალია, ზახულში განსაკუთრებით ევროპა – გერმანია, რუსეთი და უნგრეთი. უცხოელები, უფრო მეტად მთიან კურორტებს ირჩევენ, რაც შეეხება ფასებს, ჯერ-ჯერობით არ ვაპირებთ გაძვირებას.”
სტამბულ თრეველი – “ტურისტული სეზონი პრაქტიკულად უკვე გახსნილია, ჩვენ გამყვან ტურებზე ვმუშაობთ, ადგილობრივებისთვის მისაღებია – თურქეთის და ევროპის ტურისტული ქვეყნებია, ფასებიც ძირითადად გაძვირებული არ არის.”
დრიმ თრეველი – “საქართველოს ტურისტულ სეზონს ივნისიდან ვიწყებთ. უცხოელ ტურისტებს ევროპიდან ველოდებით, ადგილობრივი მოსახლეობისთვის პრიორიტეტული ტურისტული ქვეყნები – ეგვიპტე, თურქეთი და ევროპაა. უცხოელი ტურისტები საქართველოს ზღვის კურორტებს ანიჭებენ უპირატესობას. ფასების გაზრდასთან დაკავშირებით ვერაფერს გეტყვით.”
ეგზოტური – “ჩვენ ზამთრის სეზონს დეკემბრის ბოლოს ვიწყებთ, გაზაფხულის ტურს მარტიდან, ზაფხულისას ივლისიდან. წინა წელთან შედარებით წელს ნაკლები ტურისტია. ველოდებით – პოლონეთიდან, ესტონეთიდან, ბალტიისპირეთი ქვეყნებიდან ტურისტების შემოსვლას. უცხოელი ტურისტებისთვის ზღვაც და მთიანი რეგიონიც თანაბრად მოთხოვნადია. ჩვენ ვმუშაობთ, ტურისტების შემოყვანაზე და ვცდილობთ არ გავაძვიროთ ფასები იმდენად, რადმენადაც სასტუმროს ფასები მოგვცემს ამის საშუალებას, თუმცა შემიძლია ვთქვა, რომ ფასებმა მცირედით მაინც მოიმატა.”
ლაქი ტური – “ტურისტული სეზონი კახეთის ღვინის ტურებითა პრილიდან დავიწყეთ. უცხოელ ტურისტებს – შვედეთიდან, რუსეთიდან და პოლონეთიდან ველოდებით. გარე ტურებზე მოთხოვნა ზამთარში ძირითადად – დუბაიზე და ეგვიპტეზეა, ხოლო ზაფხულში – თურქეთის ეგვიპტის და ევროპის ქვეყნებზე. უცხოელი ტურისტები, განსაკუთრებით კი, რუსები ძირითადად ზღვის კურორტებს ირჩევენ. ფასები გაიზარდა.”
სქაი თრეველი – “ ტურისტულ სეზონს ივლისიდან ვიწყებთ. ტურისტებს ველოდებით – აზერბაიჯანიდან, ერევნიდან, უკრაინიდან და მოსკოვიდან. ქართველები ნაკლებად მიმართავენ შიდა ტურებს. უცხოელებისთვის კი, ზაფხულში მისაღები და მოთხოვნადი საზღვაო კურორტია. ფასებს რაც შეეხება, უცვლელია.”
მასალა მოამზადა
სალომე აფხაზაშვილმა
