საქართველო-ჩინეთს შორის აგრარული დარგის მიმართულებით თანამშრომლობის ახალი ეტაპი იწყება

იმ გარემოებათა გათვალისწინებით, რომ ორი ქვეყანა მთავრობათაშორისი ეკონომიკური კომისიის ფარგლებში თანამშრომლობს და ჩინეთი საქართველოს უმსხვილეს სავაჭრო პარტნიორთა ხუთეულშია, სოფლის მეურნეობის მინისტრების შეხვედრას განსაკუთრებული მნიშვნელობა ენიჭება.

შეხვედრაზე მხარეებმა აგრარულ დარგში ერთობლივი პროექტების განხორციელების საკითხებზე იმსჯელეს. საუბარი შეეხო ორგანული სოფლის მეურნეობის, მეჩაიეობის, მეთევზეობის, თევზის გადამუშავების ტექნოლოგიის, ასევე, სასოფლო-სამეურნეო პროდუქციის გადამუშავების სფეროში გამოცდილების გაზიარებას.
აღსანიშნავია, რომ 2014 წლის 18 ნოემბერს ხელი მოეწერა ჩინურ-ქართული თანამშრომლობის პროექტს „ბოსტნეულის მოშენების ტექნოლოგია საქართველოში“.

აღნიშნული პროექტის ხანგრძლივობა ორწელიწადნახევარია. პროექტის ფარგლებში მარნეულში 30-ზე მეტი სათბური აშენდება. აღნიშნული პროექტი ხელს შეუწყობს ქართული ბოსტნეულის მოშენების ზრდას და ახალი ტექნოლოგიების გამოყენების დანერგვას. პროექტის ფარგლებში ჩინეთის მხარე უზრუნველყოფს საირიგაციო-სამელიორაციო მანქანა-დანადგარების მოწოდებას, რომლის ღირებულება 9 მილიონ აშშ დოლარს შეადგენს.
შეხვედრაზე მინისტრებმა ხაზი გაუსვეს საქართველოსა და ჩინეთს შორის სავაჭრო ურთიერთობის განსაკუთრებულ მნიშვნელობას და ერთობლივ სამოქმედო გეგმას მოაწერეს ხელი. სამოქმედო გეგმაზე ხელმოწერით საქართველო-ჩინეთს შორის აგრარული დარგის მიმართულებით თანამშრომლობის ახალი ეტაპი იწყება.

ჩინეთის სახალხო რესპუბლიკა ქართული ღვინის მნიშვნელოვანი იმპორტიორი ქვეყანაა. 2015 წლის იანვარ-თებერვალში ქართული ღვინის ექსპორტი ჩინეთში 66,4%-ით აღემატება წინა წლის შესაბამისი პერიოდის ანალოგიურ მაჩვენებელს.

შეხვედრის შემდეგ მინისტრებმა ერთობლივი პრესკონფერენცია გამართეს.

„მნიშვნელოვანია, რომ საქართველოს ეკონომიკაში ჩინური ინვესტიციები მნიშვნელოვანად იზრდა. ჩვენ ვგეგმავთ კიდევ უფრო გავზარდოთ სავაჭრო კავშირები, ასევე, ვითანამშრომლოთ სოფლის მეურნეობის ინფრასტრუქტურის განვითარებისა და აგრარულ მრეწველობაში უახლესი ტექნოლოგიების დანერგვის მიმართულებით. 2014 წელს საქართველოს სოფლის მეურნეობის სამინისტრომ ჩინეთის რესპუბლიკის მთავრობისგან გრანტის სახით, საჩუქრად 30 ერთეული თანამედროვე ტექნიკა მიიღო. აღნიშნული ტექნიკა საქართველოში საირიგაციო სისტემებზე მიმდინარე სამუშაოებისთვის გამოიყენება. ასევე, 2015 წლის აპრილში ჩინეთის რესპუბლიკის მთავრობა საქართველოს სოფლის მეურნეობის სამინისტროს უსასყიდლოდ გადმოსცემს 26 ერთეულ სამელიორაციო ტექნიკას, რომლის ღირებულება 10 764 000 აშშ დოლარს შეადგენს“, – განაცხადა ოთარ დანელიამ.

ჩინეთის სოფლის მეურნეობის მინისტრის განცხადებით, საქართველო-ჩინეთს შორის ურთიერთოებების გაღრმავების ერთ-ერთი უმთავრესი კომპონენტი აგრარული მიმართულება შეიძლება იყოს.

„ქართულ ღვინოს აქვს უდიდესი პოტენციალი, დაიმკვიდროს ადგილი არა მარტო ჩინეთის, არამედ მსოფლიო ბაზარზე. ასევე უმნიშვნელოვანესია ჩაის კულტურის აღორძინების ხელშეწყობა. ჩვენი გამოცდილების გაზიარება ამ მიმართულებით ძალიან გამოგადგებათ. მინდა როგორც თქვენი ქვეყნის, ასევე ჩინეთის რესპუბლიკის პრემიერმინისტრთან დავაფიქსირო ჩემი მოსაზრება საქართველოს აგრარული პოტენციალის შესახებ. თქვენ უკვე გაქვთ სოფლის მეურნეობის განვითარების ისეთი სტატეგია და სამოქმედო გეგმა, რომლის განხორციელებაც დარგის განვითარებაში მნიშვნელოვანი წინსვლის გარანტიაა“, – განაცხადა ჩინეთის სახალხო რესპუბლიკის სოფლის მეურნეობის მინისტრმა, ჰან ჩანგფუმ.

საქართველოში ვიზიტის ფარგლებში ჩინეთის სახალხო რესპუბლიკის სოფლის მეურნეობის მინისტრმა, ჰან ჩანგფუმ ალავრდის სამონასტრო კომლექსი, ალავერდის ღვინის მარანი და საფუტკრე მეურნეობა, ასევე, წინანდალში 100 წლიანი ვაზი და ყვარელში ტურისტული კომპლექსი „გვირაბი“ დაათვალიერა.