ფინანსთა სამინისტროს საგამოძიებო სამსახურმა, განსაკუთრებით დიდი ოდენობით საბიუჯეტო თანხის მართლსაწინააღმდეგოდ დაუფლების ფაქტზე შპს “ჯეთპაჩერ ჯორჯიას” მოქმედი და ყოფილი დირექტორები, გურამ კიკნაძე, დავით შონია, ზურაბ ებრალიძე და მალხაზ კერესელიძე სისხლის სამართლის პასუხისგებაში მისცა.
საგამოძიებო სამსახურის უნფორმაციით, აღნიშნული საწარმო 2008-2012 წლებში სისტემატურად იმარჯვებდა ქალაქ თბილისის მერიისა და ძველი თბილისის გამგეობის მიერ გამოცხადებულ ტენდერებში გზების სარეაბილიტაციო სამუშაოებზე, რომელთა საერთო ღირებულება შეადგენდა 8 252 729 ლარს.
გამოძიების ინფორმაციით, “ჯეთპაჩერ ჯორჯიას” მიერ, რეალურად შესრულებული სამუშაოების ღირებულება გაცილებით ნაკლებია ქალაქის მერიისა და ძველი თბილისის გამგეობისთვის წარდგენილ, შესრულებული სამუშაოს აქტებში ასახულ ღირებულებაზე. კერძოდ, ბრალდებულები ოფიციალურ დოკუმენტებში უთითებდნენ ყალბ მონაცემებს, რის შედეგადაც მათ მიერ მითვისებულია სახელმწიფოს კუთვნილი, 2 027 145 ლარი.
ფინანსთა სამინისტროს საგამოძიებო სამსახურის ცნობით, გამოძიება გრძელდება სისხლის სამართლის კოდექსის 180-ე მუხლის მესამე ნაწილით, რაც სასჯელის სახით ითვალისწინებს ცხრა წლამდე პატიმრობას.
