მიმდინარე წლის 12 ივნისს თბილისის საკრებულომ საინტერესო ღონისძიებას უმასპინძლა: „განსაკუთრებული ჟურნალის“ იუბილეს და ამავე დროს ახალი ნომრის პრეზენტაციას… აღნიშნულ ღონისძიებაში დიდი ყურადღება ეთმობოდა შშმ პირთა ანუ იგივე განსაკუთრებული შესაძლებლობების მქონე ადამიანთა დასაქმებას, რესოციალიზაციასა და მათი უფლებების დაცვას, მით უმეტეს, რომ 14 ივნისს შშმ პირთა უფლებების დაცვის საერთაშორისო დღეა და ამასთან დაკავშირებით თბილისის საკრებულომ და „განსაკუთრებულმა ჟურნალმა“ დაასწრო მოვლენებს.
თბილისის მუნიციპალიტეტის საკრებულომ „განსაკუთრებულ ჟურნალს“ უმასპინძლა, რომელშიც უმეტესად შეზღუდული შესაძლებლობის მქონე პირები არიან დასაქმებულნი.
ღონისძიება, რომელიც საკრებულოს ფრაქცია „ქართული ოცნება-დემოკრატიული საქართველოსთვის“ მხარდაჭერით მოეწყო, თამარ მეფის სახელობის დარბაზში გაიმართა და ჟურნალის ერთი წლის იუბილეს მიეძღვნა.
„განსაკუთრებული ჟურნალი“ ის გამოცემაა, რომელმაც ინტეგრირებული რედაქცია შექმნა და შეზღუდული შესაძლებლობის მქონე პირები დაასაქმა.
საიუბილეო ღონისძიებას საკრებულოს თავმჯდომარე გიორგი ალიბეგაშვილი, თბილისის მერი დავით ნარმანია, საკრებულოს დეპუტატები, ჟურნალის რესპოდენტები და მოწვეული სტუმრები ესწრებოდნენ.
წარმომადგებლობითი ორგანოს თავმჯდომარემ გიორგი ალიბეგაშვილმა, ქალაქის მერმა დავით ნარმანიამ და საკრებულოს ქონების მართვის და საფინანსო-საბიუჯეტო კომისიის თავმჯდომარემ ჯაბა სამუშიამ დამსწრე საზოგადოებას სიტყვით მიმართეს და ჟურნალის რედაქციას საიუბილეო წელი მიულოცეს.
„ვულოცავ ჟურნალს იუბილეს და წარმატებას ვუსურვებ საქმიანობაში. ეს ადამიანები მხოლოდ საგამომცემლო საქმეში არ არიან ინოვაციურები, ისინი სრულფასოვან მონაწილეობას იღებენ ქვეყნის აღმშენებლობით პროცესში, შესაბამისად, საკრებულო და მერია ყოველთვის გვერდით დაუდგება და მხარს დაუჭერს მათ საზოგადოებაში ინტეგრირებას“, – განაცხადა გიორგი ალიბეგაშვილმა.
„განსაკუთრებული ჟურნალის“ დამფუძნებელმა, მთავარმა რედაქტორმა და პროექტის ავტორმა, ნუგზარ ჭიაბერაშვილმა აღნიშნა, რომ – „მათი უფლებების დაცვა წელიწადში მხოლოდ 12 ივნისს ან რომელიმე კონკრეტულ დღეს კი არა, ყოველ დღეა, ისევე, როგორც ჩვენ გვიცავს ყოველ დღე საქართველოს კონსტიტუცია და, რა თქმა უნდა, უპირველესად – ღმერთი… ჩვენ მათზე გამუდმებით უნდა ვიზრუნოთ, შეძლებისდაგვარად. ბედნიერი ვარ, რომ თბილისის საკრებულო ხელმისაწვდომია ნებისმიერი ადამიანისათვის და განსაკუთრებით, სრულად ადაპტირებულია შშმ პირთათვის, მოხარული ვარ, რომ ჩემი ქვეყნის დედაქალაქის ხელმძღვანელობა ასე აქტიურად არიან ჩართულნი განსაკუთრებული ადამიანების რესოციალიზაციაში და ყველანაირად მხარს უჭერენ მათთვის წამოწყებულ სასიკეთო საქმეს… თბილისის საკრებულოს თავმჯდომარე დღეს თანატოლი და თანასწორია ე.წ. შშმ პირებთან და ამის ნათელი მაგალითი ჩვენ ვნახეთ… გმადლობთ, ბატონო გიორგი ესოდენ დიდი გულისხმიერებისათვის!
მადლობა მინდა გადაგიხადოთ თქვენ, ბატონო მერო, ბატონო დავით, რადგან თქვენი მხარდაჭერა უდიდესი სტიმულია და განსაკუთრებული ადამიანების ჩვენს საზოგადოებაში ჩართულობისთვის და მსგავსი პროექტების წამოწყება-რეალიზაციაში. ჩვენ ნამდვილად უნდა ვიზრუნოთ ჩვენი ქალაქისა და სრულიად საქართველოს კეთილდღერობაზე…
ე.წ. შშმ პირთათვის პანდუსები მხოლოდ ეტლით მოსარგებლე ადამიანთა გადაადგილებისთვის არაა მნიშვნელოვანი – იგი ტურისტებისთვის დიდი კომფორტია და ჩვენთვის კი საამაყო, რომ ჩვენი ქვეყნის სტუმარმა გორგოლაჭებიანი ბარგი („ჩემოდანი“) ქუჩიდან ქუჩაზე ანუ „ბორდიურზე“ ადვილად გადაიტანოს… ამავე დროს ჩვენი მოქალაქეებისთვისაა მნიშვნელოვანი პანდუსებიანი ქუჩები, განსაკუთრებით იმ დედებისთვის, რომლებიც ჩვილ ბავშვებს ეტლით ასეირნებენ ქუჩაში…
ღონისძიების დასასრულს, ჟურნალის რედაქტორმა ნუგზარ ჭიაბერაშვილმა საკრებულოს და მერიას თანადგომისთვის მადლობა გადაუხადა და წარმომადგენლობითი ორგანოს თავმჯდომარეს – გიორგი ალიბეგაშვილს, მის მოადგილეებს – გიორგი ტყემალაძეს, მალხაზ მჭედლიშვილს და გიორგი ახვლედიანს, ასევე დეპუტატს ჯაბა სამუშიას და საკრებულოს აპარატის უფროსს ელენე დუმბაძეს მხარდაჭერისთვის „განსაკუთრებული სიგელები“ გადასცა.
აღსანიშნავია, რომ ჟურნალს საგამომცემლო სახლი „ქართული ელიტა“ გამოსცემს, რომელმაც მცირე ხნის წინ გაზეთები „ივერია“ და „დროება“ აღადგინა. აღნიშნული რედაქციები ასევე ინტეგრირებულია და მასში შეზღუდული შესაძლებლობის მქონე პირები არიან დასაქმებულნი.
