კულტურის მინისტრი მიხეილ გიორგაძე დღეს ქართულ-ამერიკული ანსამბლის წევრებს შეხვდება. როგორც “თბილისი თაიმსს” საქართველოს კულტურისა და ძეგლთა დაცვის სამინისტროდან აცნობეს, შეხვედრას არასამთავრობო ორგანიზაცია “საქართველოს ქალთა ბიზნეს ასოციაციის” პრეზიდენტი ნინო ქოჩიაშვილი, საქართველოში აშშ-ს საელჩოს წარმომადგენლები და სხვა მოწვეული სტუმრები დაესწრებიან.
სამინისტროს ინფორმაციით, ამერიკაში მცხოვრებმა ქართველმა ახალგაზრდებმა 13 ივნისის სტიქიის შედეგად დაზარალებული ოჯახების ბავშვების დახმარების სურვილი გამოთქვეს.
ანსამბლი “ფესვები” საქართველოს სხვადასხვა რეგიონში საქველმოქმედო კონცერტებს გამართავს. კონცერტები დაგეგმილია 12 ივლისს, თბილისში, გრიბოედოვის სახელობის დრამატულ თეატრში, 14 ივლისს ქუთაისში, ლადო მესხიშვილის სახელობის სახელმწიფო თეატრში, 16 ივლისს კონცერტი გაიმართება ბათუმში, საზაფხულო თეატრში. კონცერტებიდან შემოსული თანხა სრულად სტიქიის შედეგად დაზარალებულთა დასახმარებლად გახსნილ სპეციალურ ანგარიშზე გადაირიცხება.
როგორც სამინისტროში აცხადებენ, პროექტის ინიციატორია არასამთავრობო ორგანიზაცია “საქართველოს ქალთა ბიზნეს ასოციაცია”. პროექტის მხარდამჭერები არიან საქართველოს საპატრიარქო, თბილისის მერია, ქუთაისის მერია, ბათუმის მერია, აშშ საელჩო საქართველოში, საქართველოს კულტურის პალატა.
