ნიუ იორკში, გაეროს შტაბ-ბინაში მიმდინარე პარლამენტის სპიკერების მე-4 მსოფლიო კონფერენციის დასკვნით, მესამე სამუშაო დღეს, საქართველოს პარლამენტის თავმჯდომარემ, დავით უსუფაშვილმა ორმხრივი შეხვედრები გამართა ევროსაბჭოს საპარლამენტო ასამბლეის პრეზიდენტთან, ან ბრასორთან და გაეროს განვითარების პროგრამის აღმასრულებელ დირექტორთან, ჰელენ კლარკთან.
საქართველოს პარლამენტის თავმჯდომარისა და ევროპის საბჭოს საპარლამენტო ასამბლეის პრეზიდენტის ორმხრივ შეხვედრაზე საუბარი შეეხო საქართველოში მიმდინარე მოვლენებს და რეგიონული უსაფრთხოების ასპექტებს.
საქართველოს პარლამენტის თავმჯდომარესთან საუბრისას, ან ბრასორმა პოზიტიური შეფასება მისცა ევროპის საბჭოს საპარლამენტო ასამბლეაში საქართველოს დელეგაციის საქმიანობას. მან, ასევე, მადლობა გადაუხადა ქართველ კოლეგას მიმდინარე წლის მაისში საქართველოში მასპინძლობისთვის. „ვფიქრობ, რომ ეს ვიზიტი ძალზედ საინტერესო, ნაყოფიერი და დატვირთული იყო ინფორმაციული თვალსაზრისით”, – აღნიშნა მან.
ამავე დღეს, პარლამენტის თავმჯდომარემ, დავით უსუფაშვილმა ორმხრივი შეხვედრა გამართა გაეროს განვითარების პროგრამის აღმასრულებელ დირექტორთან, ჰელენ კლარკთან. მხარეებს შორის საუბარი შეეხო აპრილში თბილისში მომხდარ სტიქიურ უბედურებას. ჰელენ კლარკმა დავით უსუფაშვილს მიუსამძიმრა იმ მძიმე დანაკარგის გამო, რაც განიცადა საქართველომ იმ პერიოდში და ამ კონტექსტი აღნიშნა, რომ გაეროს განვითარების პროგრამის ფარგლებში აქტიურად მიმდინარეობს მუშაობა ბუნებრივი კატასტროფების რისკის შემცირებისა და პრევენციის პროექტებზე. გაეროს განვითარების პროგრამის აღმასრულებელ დირექტორის თქმით, „გაეროს განვითარების პროგრამა ყოველთვის მხარში უდგას საქართველოს და მრავალი მიმართულებით აგრძელებს მუშაობას.” საქართველოს პარლამენტის თავმჯდომარემ, თავის მხრივ, მადლობა გადაუხადა ჰელენ კლარკს პროგრამის ფარგლებში განხორციელებულ და მიმდინარე საპარლამენტო პროექტებთან დაკავშირებით.
ჰელენ კლარკი, ასევე, დაინტერესდა საქართველოს საკანონმდებლო ორგანოს მუშაობით და დაგეგმილი კანონპროექტებით. დავით უსუფაშვილმა დეტალური ინფორმაცია მიაწოდა მას კანონშემოქმედებით საქმიანობასთან დაკავშირებით და აღნიშნა, რომ „პარლამენტს, მართლაც, მრავალ ძალიან მნიშვნელოვან საკითხზე მოუწევს მუშაობა, როგორიცაა, მაგალითად, ეროვნული ბანკის შესახებ კანონპროექტი.”
საუბრის დასასრულს, გაეროს განვითარების პროგრამის აღმასრულებელმა დირექტორმა აღნიშნა, რომ დავით უსუფაშვილი ქართულ პოლიტიკაში ძალიან მნიშვნელოვანი ფიგურაა, რომელსაც შესწევს უნარი, ხელი შეუწყოს ეფექტურ დიალოგს და დისკუსიას საპარლამენტო პოლიტიკურ სუბიექტებს შორის.
