„საქართველოს როლი და მნიშვნელობა ერთიანი ევროპული უსაფრთხოების არქიტექტურაში“ – თავდაცვის მინისტრმა ევროპელ ლიდერებს ცენტრალურ და აღმოსავლეთ ევროპაში, ერთ-ერთ ყველაზე მასშტაბურ ღონისძიებაზე, პოლონეთის ქალაქ კრინიცაში, მიმართა. უსაფრთხოების პლენარულ სესიაზე თინათინ ხიდაშელის სიტყვას ევროპელი ლიდერები, მსხვილი საერთაშორისო ორგანიზაციის წარმომადგენლები, ექსპერტები და პარლამენტისა და არასამთავრობო ორგანიზაციის წარმომადგნელები ისმენდნენ.
როგორც “თბილისი თაიმსს” თავდაცვის სამინისტროდან აცნობეს, თინათინ ხიდაშელის თქმით, მნიშვნელოვანია საქართველოს შესახებ ინფორმაცია ევროპაში ისეთი საერთაშორისო დონის ფორუმებიდან და ტრიბუნებიდან ისმოდეს, როგორიც კრინიცას 25-ე ეკონომიკური ფორუმია.
მისი თქმით, ფორუმის უსაფრთხოების პლენარულ სესიაზე საქართველოსთან ერთად განიხილებოდა ევროპისა და ჩრდილო-ატლანტიკური ალიანსის წინაშე არსებული უსაფრთხოების გამოწვევები, სამომავლო გეგმები და მოვლენების სავარაუდო განვითარების პერსპექტივები.
უსაფრთხოების პლენარულ სესიაზე მინისტრმა ევროპელ ლიდერებს კიდევ ერთხელ შეახსენა, რომ უკრაინაში მიმდინარე მოვლენები, რუსეთის მიერ 2008 წელს საქართველოში განხორციელებული სამხედრო აგრესიის გაგრძელებაა, რომელიც „მცოცავი ოკუპაციის“ სახით დღესაც გრძელდება.
როგორც თავდაცვის მინისტრმა განმარტა – „კრინიცას 25-ე ეკონომიკური ფორუმი ყოველწლიურად ტარდება პოლონეთის ქალაქ კრინიცაში. წელს რიგით 25-ე კონფერენცია გაიმართა. ეკონომიკურ ფორუმს ყოველწლიურად 2500-3000 მონაწილე ჰყავს, ეკონომიკის და საზოგადოებრივი ლიდერების სახით.
ფორუმს მასშტაბურ გაშუქებას მსოფლიოს 60-მდე ქვეყნის 500 ჟურნალისტი უზრუნველყოფს. ფორუმის ორგანიზატორია ფონდი აღმოსავლეთის კვლევების ინსტიტუტი, რომელიც 1992 წელს, ქალაქ ვარშავაში დაარსდა“.
