ცესკოს თავმჯდომარე თამარ ჟვანიამ ევროპის საარჩევნო მოხელეთა ასოციაციის (ACEEEO) რიგით 24-ე ყოველწლიურ საერთაშორისო კონფერენციაში მიიღო მონაწილეობა. თამარ ჟვანია, 10 სექტემბერს კონფერენციაზე პრეზენტაციით წარდგა თემაზე – „საარჩევნო ტრენინგების პროგრამების მიმოხილვა საქართველოში“.
მან, ქვეყანაში საარჩევნო კულტურის განვითარებაზე გაამახვილა ყურადღება, ისაუბრა დაინტერესებული მხარეების საარჩევნო პროცესებში ჩართულობის უზრუნველყოფაზე, ამომრჩეველთა განათლების აუცილებლობასა და საარჩევნო ადმინისტრაციაში საარჩევნო სასწავლო პროგრამების განვითარების ეტაპებზე. ცესკოს თავმჯდომარესთან ერთად კონფერენციაზე ცესკოს სწავლების ცენტრის ხელმძღვანელი ნათია ზაალიშვილი იმყოფებოდა, რომელიც სპეციალურ მიზნობრივ სემინარს წარუძღვა და მონაწილეებს არჩევნებში ჩართული მხარეების ქცევის კოდექსზე ესაუბრა. მოლდოვის პარლამენტის ვიცე-სპიკერმა კი თავის გამოსვლაში საქართველოს და მოლდოვის ტრენინგების ცენტრების მნიშვნელობის შესახებ აღნიშნა.
ACEEEO-ს კონფერენცია, ორ მნიშვნელოვან თემას – არჩევნებში ჩართული მხარეებისთვის ტრენინგების მნიშვნელობას და ამომრჩევლთა ხმების თანასწორობას ეხებოდა.
სამდღიანი ღონისძიება, საარჩევნო მოხელეთა ასოციაციამ მოლდოვის საარჩევნო ადმინისტრაციასთან მჭიდრო თანამშრომლობით გამართა, რომელიც 2015 წელს ACEEEO-ს თავმჯდომარე ქვეყანა იყო. კონფერენციის პირველ დღეს, 2016 წლისთვის ასოციაციის თავმჯდომარე ქვეყანად ალბანეთის საარჩევნო ადმინისტრაცია აირჩიეს.
კონფერენციას, რომელიც 9 სექტემბერს გაიხსნა, მოლდოვის სამთავრობო და საკანონმდებლო უწყებების ხელმძღვანელი პირები, მათ შორის პარლამენტის ვიცე სპიკერი, საკონსტიტუციო სასამართლოს თავმჯდომარე, იუსტიციის და საგარეო საქმეთა მინისტრები ესწრებოდნენ. ღონისძიებაში მონაწილეობდნენ რუმინეთის, ალბანეთის, რუსეთის, სომხეთის, ლიტვის, ყირგიზეთის, ბულგარეთის, მაკედონიის, ყაზახეთის და ბოსნია და ჰერცეგოვინას საარჩევნო ადმინისტრაციების წარმომადგენლები; მონაწილე საერთაშორისო ორგანიზაციებს შორის იყვნენ ევროპის საბჭოს ვენეციის კომისია, საარჩევნო სისტემების საერთაშორისო ფონდი (IFES), ევროპის საარჩევნო მხარდაჭერის ცენტრი, ეუთო/ოდირი, დემოკრატიისა და საარჩევნო მხარდაჭერის საერთაშორისო ინსტიტუტი, მსოფლიოს საარჩევნო ადმინისტრაციების ასოციაციის წარმომადგენლები (A-WEB)და ა.შ.
