21-ე საუკუნეში თავის მოვლა ადამიანის ყოველდღიური ცხოვრების განუყოფელი ნაწილია. ადრე თუ ამ საკითხით გამორჩეულად ქალბატონები ინტერესდებოდნენ, დღეს, საბედნიეროდ, ეს მამაკაცებისთვისაც აქტუალური გახდა. ჩვენ ვცდლობთ, გამოვიყურებოდეთ კარგად, გავუფრთხილდეთ ჩვენს სხეულს, კანს და რაც შეიძლება დიდხანს შევუნარჩუნოთ მათ სილამაზე და სიცოცხლისუნარიანობა.
თავის მოვლა თუ ადამიანის პირადი არჩევანია, ჰიგიენური საშუალებების გამოყენება ნამდვილად აუცილებელია და მას არანაირი კავშირი არ აქვს განსაკუთრებულ სურვილთან. ჩვენ ყველანი ვიყენებთ დასაბან საშუალებებს, შამპუნს, საპონს, კბილის პასტას და თუ რატომ, ამას განმარტებაც არ სჭირდება.
თანამედროვე სამყაროში თავის მოვლისთვისა და ჰიგიენის დაცვისთვის განკუთვნილი უამრავი პროცედურა თუ საშუალება არსებობს. ჩვენი ეკონომიკური პირობების გათვალისწინებით, ბევრი მათგანით სარგებლობა საკმაოდ ძვირი სიამოვნებაა, თუმცა საქართველოს ბაზარზე ხელმსაწვდომ საშუალებებსაც მრავლად გვთავაზობენ. თითქმის არაფერი ქართული, ყველაფერი იმპორტირებული სხვადასხვა ქვეყნებიდან.
დიდია არჩევანი. ბევრი ფიქრის შემდეგ, თითქოს, იმას ვყიდულობთ, რაც გვსურს, მაგრამ მაინც ხშირია უკმაყოფილება და პრობლემებიც მრავალგვარია: თმის ცვენა და გაუხეშება, ქერტლი, კანის სიმშრალე თუ ცხიმიანობა, ალერგია – დარწმუნებული ვარ, თითოეული თქვენგანის სამეგობროში მოიძებნება ადამიანი, რომელსაც ჩამოთვლილი საკითხები აწუხებს. იმედია, ეს თავად თქვენ არ ხართ.
ამ პრობლემების მუდმივად არსებობა გამოყენებული ჰიგიენური თუ თავის მოვლის საშუალებების ხარისხიანობასთან დაკავშირებთ ლოგიკურ ეჭვს აჩენს. აკონტროლებს ვინმე მათ გაყიდვას? არსებობს მონიტორინგის სამსახური, რომელიც ამ განხრით მუშაობს?– „თბილისი თაიმსი“ ამის გარკვევას შეეცადა. არსებული მდგომარეობა საკმაოდ საინტერესოა – აღმოჩნდა,რომ ჩვენს ქვეყანაში მსგავსი საშუალებების რეალიზაცია სრულიად არ კონტროლდება, თუმცა ამაზე მოგვიანებით.
იმის შესახებ, თუ როგორ ავარჩიოთ ჩვენთვის მაქსიმალურად სასარგებლო პროდუქცია და ზოგადად, რა საფრთხეების წინაშე ვდგავართ ყოველდღიური ჰიგიენის დაცვის დროს, ჩვენ ექიმ-დერმატოლოგ მარინა ინოზემცევას ვესაუბრეთ:
რა ტიპის თავის მოვლის საშუალებები უნდა გამოვიყენოთ?
– ამ კითხვაზე ზოგადი პასუხის გაცემა შეუძლებელია. ყველა ადამიანს აქვს გარკვეული ტიპის კანი თუ თმა, რომელსაც სპეციფიური მოვლა სჭირდება. დღეს აფთიაქებში ძალიან უხვად გვთავაზობენ სხვადასხვა ქვეყნის წარმოების პროდუქციას, რომელთაც კონკრეტული მიმართულებები აქვთ. თუ ვიცით, რომ ადამიანს ალეგრიული კანი აქვს, მან ანტიალერგიული კრემი უნდა გამოიყენოს. თითქმის ყველა მწარმოებელს აქვს ხაზი – მგრძნობიარე კანისთვის. მათ, ვისაც ძალიან მშრალი კანი აქვთ, დღის და ღამის დამატენიანებელს ვურჩევთ, 24 საათიანი კრემი მათთვის საკმარისი არაა. მშრალი ტიპის კანის მქონე ადამიანმა არ უნდა გამოიყენოს სპირტიანი ხსნარები და ლოსიონები – ისინი ცხიმიანი კანისთვისაა განკუთვნილი. ასეთივე მიდგომაა თმისა თუ სხვა შემთხვევებშიც, მოვლის ყველანაირი საშუალება კონკრეტული ტიპის მიხედვით უნდა ავარჩიოთ.
რამდენად უსაფრთხო და სანდოა თავის მოვლის ის საშუალებები, რომელთაც საქართველოს ბაზარზე ვხვდებით?
– ერთმნიშვნელოვნად ყველაზე უსაფრთხო საშუალებების ან შამპუნების დასახელება შეუძლებელია. მათ სანდოობაზე ზრუნვა აფთიაქის პირდაპირი კომპეტენციაა. წესით, მსგავს დაწესებულებაში შემოთავაზებული პროდუქტი მაქსიმალურად უსაფრთხოა. თუმცა, ჩვენთან თავის მოვლისა და ჰიგიენურ საშუალებებს მხოლოდ აფთიაქებში არ შევხდებით. ბაზრობებზე და მსგავს ადგილებში რომ პროდუქცია იყიდება, მათ ხარისხზე საუბარი ცოტა რთულია, არც მათი წარმოშობა ვიცით და არც არაფერი. სწორედ ამიტომ, ყველას ვთავაზობთ, რომ კანის, სხეულის მოვლისა თუ დასაბანი საშუალება შეიძინონ აფთიაქებში. იქ ყველაფერი უფრო უსაფრთხოა, ვიდრე სხვადასხვა მაღაზიაში.
გსმენიათ თუ არა ისეთი შემთხვევების შესახებ, როდესაც თავის მოვლის კონკრეტულმა საშუალებამ პაციანტის ჯანმრთელობას ავნო?
– ჯანმრთელობისთვის ზიანის მიყენება შეიძლება, ცოტა გადამეტებული ნათქვამია, მაგრამ ყოფილა პატარ-პატარა შემთხვევები. მაგალითად, პაციენტს კონკრეტული შამპუნის გამოყენებისგან გაუჩნდა ქერტლი და ა.შ. ასეთ შემთხვევაში რეკომენდირებულია ახალი, მისთვის უფრო შესაფერისი საშუალების შერჩევა. ალერგიის შემთხვევებიც მრავლად დაფიქსირებულა. მაგალითად, პაციენტი სარგებლობს კრემით, კანი კი ალერგიულ პასუხს აძლევს. ასეთ დროს უკვე მკურნალობაა საჭირო, გავაქრობთ ალერგიას და მხოლოდ ამის შემდეგ გამოიყენებს პაციენტი სხვა საშუალებას.
ძირითადად რა ტიპის საფრთხეა მოსალოდნელი ბაზარზე შემოთავაზებული პროდუქციის გამოყენებისას?
– ჩვენს ბაზარზე შეიძლება, შემოტანილი იყოს ფალსიფიცირებული პროდუქცია, ჩვენ ხომ ბოლომდე არ ვიცით რა ხდება. ასეთმა პროდუქციამ შეიძლება, გამოიწვიოს ალერგია, ქავილი, აქერცვლა და ა.შ. უფრო დეტალურად საუბარი კონკრეტული შემთხვევების განხილვისას შეიძლება.
რას უნდა მივაქციოთ ყურადღება თავის მოვლის საშუალების შერჩევისას? როგორ მივხვდეთ, რომ ის უსაფრთხოა?
– კრემებს, შამპუნებს და თითქმის ყველაფერს დღეს გამოყოფილი აქვს სპეციალური ხაზები კანის ტიპის მიხედვით. ჩვენ ყურადღება სწორედ ამას უნდა მივაქციოთ, შევიძინოთ ჩვენთვის შესაფერისი პროდუქტი. თუ პაციენტმა თავისი კანის ტიპი არ იცის, დღეს ამის გამოკვლევა თითქმის ყველა აფთიაქში არსებობს.
რაც შეეხება ბავშვებს, მათთვის ძალიან სპეციფიური ჰიგიენური საშუალებებია საჭირო, ამ შემთხვევაში როგორია პროდუქციის არჩევანი და მოსალოდნელი საფრთხეები? რას მივაქციოთ ყურადღება?
– ყოფილა შემთხვევები, როცა მშობელს ესა თუ ის საშუალება გამოუყენებია და უთქვამს, რომ ბავშვს კანი გამოუშრა და აშ. მშობელი ამ დროს თავისი ნებით თუ ვინმეს რჩევით არჩევს ამ საშუალებას და ამაზე მეტი დაფიქრებაა საჭირო. ამ შემთხვევაშიც განსაკუთრებულად მნიშვნელოვანია, რომ ჰიგიენური საშუალება ბავშვის კანისა თუ თმის ტიპის მიხედვით შეირჩეს. ისევ და ისევ ვიმეორებ, რომ ასეთი პროდუქცია აუცილებლად აფთიაქში უნდა შევიძინოთ.
როგორც ხედავთ, საკმაოდ დიდი მნიშვნელობა აქვს თავის მოვლისა თუ ჰიგიენური საშუალების შერჩევას, თუმცა მათი სანდოობის გარანტია ამ შემთხვევაშიც არ არსებობს. ჩვენ ვიცით, რომ აღნიშნული პროდუქცია საქართველოს ტერიტორიაზე შემოდის, თუმცა სად მიდის ან რა ემართება მას ამის შემდეგ – არა. „თბილისი თაიმსი“ სწორედ ამის გარკვევას შეეცადა.
პირველ რიგში, შემოსავლების სამსახურს მივმართე კითხვებით:
1. ახორციელებთ თუ არა საქართველოში შემოსული ჰიგიენური საშუალებების (საპონი, შამპუნი, კრემი, დასაბანი და ბავშვის ჰიგიენური საშუალებები…) კონტროლს? არსებობს თუ არა სამსახური, რომელიც ადგენს კორკრეტული საშუალება უსაფრთხოა ჯანმრთელობისთვის თუ არა?
2. რა კრიტერიუმებს უნდა აკმაყოფილებდეს ჰიგიენური თუ თავისა და კანის მოვლის საშუალება, რომელიც მოხვდება საქართველოს ბაზარზე? რა საბუთი უნდა ახლდეს მას თან?
მათგან კი ეს პასუხი მივიღე: „გაცნობებთ, რომ არასაგადასახადო კუთხით რეგულირებადი საკითხები სცილდება ჩვენს კომპეტენციას.“
შესაძლოა, შემოსავლების სამსახური არ აკონტროლებს მათ ხარისხს, თუმცა გამორიცხულია, რომ იმპორტირებულმა პროდუქციამ ქვეყნის საზღვარი გარკვეული დოკუმენტის გარეშე გადმოკვეთოს. სხვას ვის ვკითხოთ ამ საბუთის შესახებ ან ვისი კომპეტენციაა ამაზე პასუხის გაცემა, თუ არა მათი, არ ვიცი.
შემდეგ ვიფიქრე, რომ შესაძლებელია, ჯანდაცვის სამინისტროში არსებობს რაიმე სამსახური, რომელიც ჰიგიენური თუ თავის მოვლის საშუალეების უსაფრთხოებაზე ზრუნავს. თუმცა აღმოჩნდა, რომ აღნიშნულ პროდუქციასთან ჯანდაცვის სამინისტროსაც არანაირი კავშირი არ აქვს.
ძვირფასო მკითხველებო, დღეს თავის მოვლის საშუალებების კონტროლი თავად თქვენი პრეროგატივაა. არ იფიქროთ, რომ ყველაფერი სანდოა. კარგად დაფიქრდით, კარგად გადაამოწმეთ და მხოლოდ მას შემდეგ შეიძინეთ თუნდაც ყოველდღიური მოხმარების ჰიგიენური საშუალებები.
მოამზადა თეა ღვინაძემ
