“თავისუფალი დემოკრატები” ხელისუფლებას ლარის კურსის დასარეგულირებლად კონკრეტული ნაბიჯების გადადგმას სთავაზობენ.
როგორც “თავისუფალი დემოკრატების” ლიდერმა, ირაკლი ალასანიამ დღეს გამართულ პრესკონფერენციაზე განაცხადა, პრობლემას წარმოადგენს არა მარტო ლარის კურსის ნაკლებ მსყიდველუნარიანობა, არამედ ის, რომ კატასტროფულად იზრდება ფასები, მათ შორის, თბილისელებს ელექტროენერგიის საფასური 40 %-ით გაუძვირდათ.
ალასანიას თქმით, ამ დროს ხელისუფლება აგრძელებს არსებული ვითარების გარე ფაქტორებზე გადაბრალებას, რითაც კიდევ ერთხელ ამტკიცებს, რომ ვერ ხედავს რეალურ სურათს ან არ აქვს უნარი შესაბამისად იმოქმედონ.
“გვსურს, კიდევ ერთხელ შევახსენოთ ხელისუფლებას, რა არის გასაკეთებელი, რათა ქვეყანა არ წავიდეს კოლაფსისკენ და ამ კრიზისმა არ მიიღოს შეუქცევადი სახე. მთავრობის მხრიდან საჭიროა კონკრეტული ნაბიჯების გადადგმა. პირველი ის, რომ შემცირდეს ბიუროკრატიული ხარჯები, რაც შეამცირებს ლარის მასის გაშვებას ბაზარზე. მეორე, გაააქტიურონ კომუნიკაცია მსოფლიო საფინანსო ინსტიტუტებთან, რათა გაიზარდოს ინფრასტრუქტურული პროექტების დაფინანსება გრძელვადიანი შეღავათიანი სესხით. მესამე, როცა ვსაუბრობთ მოლოდინებზე, მოლოდინებს ახლავს ის დამოკიდებულება, რაც ინსტიტუტებს შორის არის, განსაკუთრებით ეროვნულ ბანკთან მიმართებაში. ეს ქმნის არასტაბილურობის განცდას ბიზნესმენებსა და ინვესტორებში. საჭიროა, ეროვნულ ბანკსა და მთავრობას შორის აღდგეს ნორმალური ურთიერთობა და ინსტიტუტები პატივისცემით მოეპყრან ერთმანეთს. მეოთხე ფაქტორი კი არის საექსპორტო ბაზრის დივერსიფიცირება. ჩვენ ერთი წელია, გაფორმებული გვაქვს ევროკავშირთან ასოცირების შეთანხმება, თუმცა არანაირი რეალური ცვლილება სტრატეგიაში ბაზრის დივერსიფიცირების კუთხით არ მომხდარა. მხოლოდ რუსულ ბაზარზე ორიენტირება არის კატასტროფული შედეგების მომტანი”, – განაცხადა ირაკლი ალასანიამ.
მისივე თქმით, “თავისუფალი დემოკრატებს” აქვთ პრაგმატული გეგმა, თუ როგორ უნდა მოხდეს საგარეო ინვესტიციების მოზიდვა და შიდა ინვესტირების გაზრდა და აღნიშნულ გეგმას ოქტომბრის პირველ კვირაში წარმოადგენენ.
