ოქტომბრის საპარლამენტო არჩევნების შემდეგ საქართველოს სარეკლამო ბაზარი უფრო კონკურენტუნარიანი გახდა. პოლიტიკა აღარ თამაშობს მნიშვნელოვან როლს სარეკლამო თანხების განაწილებაში და კომპანიები ახლა უკვე თავისუფლად იღებენ გადაწყვეტილებებს საკუთარი დანახარჯების შესახებ.
ამის შესახებ ნათქვამია „საერთაშორისო გამჭვირვალობა – საქართველოს“ ანგარიშში „საქართველოს სარეკლამო ბაზარი -ახლა უკვე კონკურენციის პირობებში?“ , რომლის პრეზენტაცია დღეს სასტუმრო ამბასადორში გაიმართა.
ანგარიშში ნათქვამია, რომ კერძო სექტორის სარეკლამო დანახარჯები არ გაზრდილა, რადგანაც ინვესტორებს კვლავაც აფიქრებთ პოლიტიკური არასტაბილურობა.
ანგარიშში აღნიშნულია:
- სამთავრობო ცვლილებებიდან მალევე სარეკლამო სექტორში ძირფესვიანი ცვლილებები მოხდა. „ჯენერალ მედია“- მონოპოლისტი კომპანია, რომელიც ნაციონალურ არხებზე რეკლამას ყიდდა, აღარ არსებობს. ტელეკომპანიები ახლა გაყიდვების საკუთარი გუნდებით უწევენ ერთმანეთს კონკურენციას.
- ყოფილი თავდაცვის მინისტრი დავით კეზერაშვილი, რომელიც 2011 და 2012 წლებში რამდენიმე უმსხვილეს სარეკლამო კომპანიას აკონტროლებდა , რამაც ბაზრის პოლიტიზება და მაღალი კონცენტრაცია გამოიწვია, სარეკლამო სექტორში აღარ ფიგურირებს. მისი კუთვნილი რამდენიმე კომპანია წარმოშობით ქართველი რუსეთში მოღვაწე ბიზნესმენის, დავით იაკობიძის ხელში გადავიდა.
- „საერთაშორისო გამჭვირვალობა-საქართველოს“ გამოთვლებით რეკლამაზე გაწეულმა მთლიანმა დანახარჯმა 2012 წელს დაახლოებით 54 მილიონი აშშ დოლარი შეადგინა. ამ თანხაში შედის პოლიტიკური პარტიების მიერ რეკლამაზე დახარჯული მინიმუმ 8 მილიონი აშშ დოლარიც. სარეკლამო დანახარჯების ყველაზე დიდი ნაკადი -72 პროცენტი კვლავაც სატელევიზიო სექტორში მიედინება. ამ თანხების 95 % კი თბილისში დაფუძნებულ ტელევიზიებზე მოდის. სარეკლამო დანახარჯების 11 % გარე რეკლამაზე, 10 % კი რადიო რეკლამაზე მოდის. პრესა სარეკლამო დანახარჯების 5 % იზიდავს. რაც შეეხება ინტერნეტ რეკლამას, ზრდის ტენდენციების მიუხედავად, მისი წილი მთლიან სარეკლამო დანახარჯების მხოლოდ 2 % შეადგენს , ეს კი 1.5 მილიონ აშშ დოლარზე ნაკლებია.
„ბევრ მედია საშუალებას ჯერაც არ ჰყავს სარეკლამო გაყიდვების სპეციალისტი, რომელიც რეკლამის დამკვეთთა მოზიდვას ეცდებოდა, რადგან პოლიტიკა სარეკლამო ბიუჯეტის განსაზღვრისას გადამწყვეტ როლს აღარ თამაშობს, მედია საშუალებებმა, რომლებიც მაღალი ხარისხის პროდუქტს სთავაზობენ მომხმარებელს, მარკეტინგს მეტი ყურადღება უნდა მიაქციონ ფინანსური დამოუკიდებლობის მოსაპოვებლად. მათ უფრო მჭიდროდ უნდა ითანამშრომლონ რეკლამის დამკვეთებთან და სხვა მედიასაშუალებებთან. მედიასაშუალებები უნდა შეეცადნონ დახვეწონ ბაზრის კვლევის მეთოდი და გამოკვეთონ რეკლამის დადებითი ზეგავლენა ბიზნესზე, რაც სარეკლამო დანახარჯების ზრდას შეუწყობს ხელს. “ – აცხადებს „ საერთაშორისო გამჭვირვალობა – საქართველოს“ უფროსი მედია ანალიტიკოსი მათიას ჰუტერი.
28.06.13
