საქართველოს საპატრიარქოში გაიმართა შეხვედრა სრულიად საქართველოს კათოლიკოს-პატრიარქსა და საქართველოს მუსლიმთა სამმართველოს წარმომადგენლებს შორის, რომელსაც რელიგიის სააგენტოს თავმჯდომარე ზაზა ვაშაყმაძეც ესწრებოდა.
შეხვდერზაე კიდევ ერთხელ გაესვა ხაზი, რომ ისლამს არანაირი კავშირი არ აქვს ტერორიზმთან. პატრიარქმა ბოლო დროს რუსეთსა და თურქეთს შორის ურთიერთობის დაძაბვის შესახებ ისაუბრა და აღნიშნა, რომ ეს კიდევ ერთხელ მეტყველებს, რომ რთული სიტუაციაა. მან მიმართა დამსწრე საზოგადოებას, თუ რა გზებს ხედავენ ისინი, რათა ამ საფრთხის თავიდან აცილება მოხდეს.
“ორი კვირის წინ ვთქვი, რომ ამ ნეგატიურ მოვლენებეში რელიგიას არ აქვს კავშირი და ეს თვითონ ბოროტი ადამიანების მოქმედებაა. სიახლოვე ქრისტიანებსა და მუსლიმებს შორის დღეს არ დაწყებულა. ჩვენ მრავალი საუკუნის მანძილზე ვიდექით ერთმანეთის გვერდით. მინდა თქვენგან მოვისმინო, თუ რა გზები არსებობს, რომ ეს საფრთხე თავიდან ავიცილოთ. მე მოხარული ვარ, რომ გხედავთ და ჩვენთან მობრძანდით“, – ბრძანა პატრიარქმა.
დასავლეთ საქართველოს მუფთმა ბეგლარ ქამაშიძემ ხაზი გაუსვა საუკუნეების განმავლობაში ქართველ მუსლიმებსა და ქართველ მართლმადიდებლებს შორის მეგობრული ურთიერთობების გაგრძელების საჭიროებას.
“თქვენ თქვით, რომ ისლამი არაფერ შუაშია. ტრადიციული ისლამი სიმშვიდეს ურთიერთსიყვარულს, ურთიერთდახმარებას ქადაგებს. თქვენს სიტყვებში ეს ყველაფერი ამოიბეჭდა… ყოველთვის უნდა გავუფრთხილდეთ ერთმანეთის ღირებულებებს, უნდა დავაფასოთ ერთმანეთის სარწმუნოება. გამოსავალს მე უფრო მეტად განათლებაში ვხედავ. სახელმწიფო თანადგომას გვიცხადებს ჩვენ, რომ საქართველოში გაიხსნას მედრესეს სახით სასწავლებელი, რომელიც ადამიანებს ძირითადი ისლამის სიყვარულს ჩაუნერგავს და არ იქნება მოძალადე”-განაცხადა ბეგლარ ქამაშიძემ და სრულიად საქართველოს მუსლიმთა სამმართველოს სახელით კათოლიკოს-პატრიარქს ილია მეორეს მადლობა გადაუხდა.
თავის მხრივ, რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძემ აღნიშნა, რომ შეხვედრა არსებული სიტუაციის ფონზე მიზანშეწონილია. “დემონსტრირება მოხდა იმ თანადგომისა და თანამშრომლობისა, რაც ყოველთვის არსებობდა. განწყობა დადებითია. უწმინდესის მხრიდან დემონსტირებული იყო ცნობილი მესიჯები და მუსლიმი თემისგანაც მოხდა იმის დადასტურება, რომ საქართველოს ეკლესიასა და სახელმწიფოსთან ერთად, არსებული გამოწვევების ფონზე, ერთობლივად იმოქმედონ ქვეყნის საკეთილდღეოდ“, – განაცხადა ვაშაყმაძემ.
სოფიკო ნინიკაშვილი
