გუშინ საქართველოში მცოხვრებმა ებრაული თემის წარმომადგენლებმა ხანუქას-მტერზე გამარჯვებისა და ტაძრის გაწმენდის–დღესასწაულის დაწყება აღნიშნეს.
დღესასწაული თბილისის მთავარ სინაგოგაში შეკრებილ მორწმუნეებს პრემიერ-მინისტრმა ირაკლი ღარიბაშვილმა მიულოცა, ებრაელ ხალხს მშვიდობა და კეთილდღეობა უსურვა. მან პირველი სანთელიც აანთო და დამსწრე საზოგადოებას სიტყვით მიმართა, სადაც ხაზი გაესვა ქართველებსა და ებრაელებს შორის არსებულ საერთო ღირებულებებს, რაც მრავალსაუკუნოვანი მეგობრობის საფუძველი გახდა.
“მნიშვნელოვანია, რომ ქართველებს და ებრალებს შორის არსებობდეს მუდმივი ძმობა და სიყვარული. დღევანდელი დღე არის სინათლის სიბნელეზე და სიკეთის ბოროტებაზე გამარჯვების დღე. მინდა გისურვოთ მშვიდობა; ჩვენ საკმაოდ რთულ პერიოდში გვიწვეს ცხოვრება, ამიტომ გვმართებს დიდი მოთმინება და გონიერება. ვუსურვებ ებრაელ ხალხს გაძლიერებას და მშვიდობას ქართველ ხალხთან ერთად. დაე, დღეს აქ დანთებული სანთელი იყოს სიმბოლო უკეთესი ხვალინდელი დღის,”-განაცხადა ირაკლი ღარიბაშვილმა.
ხანუქას დღესასწაულისადმი მიძღვნილ ღონისძიებას ასევე ესწრებოდენ საქართველოში მცხოვრები ებრაელები, ისრაელის ელჩი იუვალ ფუქსი, თბილისის მერი დავით ნარმანია და რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე.
შეგახსენებთ, რომ ხანუქა ერთ-ერთი უძველესი ებრაული დღესასწაულია და აღინიშნება ბერძნებისგან შეურაცხყოფილი ტაძრის განახლების გასახსენებლად. ტრადიციულად რვა დღის განმავლობაში სასანთლეზე-რვაქიმიან მენორაზე თითო სანთელი ინთება. ხანუქას დღესასწაული 14 დეკემბრამდე გრძელდება.
სოფიკო ნინიკაშვილი
