მეცნიერები თანხმდებიან, რომ ვაზის მოშინაურების პროცესი და ღვინის წარმოება სამხრეთ კავკასიის, დღევანდელი აღმოსავლეთ თურქეთისა და დასავლეთ ირანის ტერიტორიებზე მოხდა. ამ ფაქტს ადასტურებს, საქართველოში აღმოჩენილი ყურძნის კურკები, ანუ წიპწები,რომლებიც ჩვ.წ.აღ.-მდე 5-6 ათასი წლით დათარიღებულ საცხოვრებლებში იპოვეს.
იმ ხანიდან დღემდე ქართველებისთვის ღვინო ისტორიასთან, ტრადიციებთან და კულტურასთან ასოცირდება. ის მნიშვნელოვანი და აუცილებელი ატრიბუტია ქართულ სუფრაზე, ღვინის მაღაზიებში კი ერთმანეთისგან სრულებით განსხვავებულ ქართულ ღვინოებს შევხვდებით. „ქართული სიმღერა და ქართული ღვინო ერთმანეთის განუყოფელი ნაწილია, ძნელია ითქვას, რომელი რომლით იწყება და გრძელდება. სწორედ ამ მიმართულებიდან გაჩნდა „რანინას“ იდეა“. – ამბობს ჩვენთან საუბრისას ტატა გორდელაძე.
ახალი ბრენდის შესახებ ინფორმაცია ქართულ ბაზარზე მალე გავრცელდა. ყველასთვის საინტერესო და განსხვავებულმა დიზაინმა საზოგადოების ყურადღება უკვე მიიპყრო. EPICA AWARDS 2015-ზე კი, რომელიც მსოფლიოში უმსხვილეს კრეატიული რეკლამის ფესტივალს წარმოადგენს, „რანინამ“ საუკეთესო პრინტის კატეგორიაში გაიმარჯვა.
„თბილისი თაიმსს“ ახალი ქართული ღვინის შესახებ ვრცლად პროექტის მენეჯერი, კომპანია branding.ge-ს წარმომადგენელი ტატა გორდელაძე ესაუბრა.
როგორია ღვინის კომპანია „დუგლაძე ვაინს ენდ სპირიტს“-ის ახალი ბრენდის „რანინას“ შექმნის ისტორია?
– ბრენდი „რანინა“ „დუგლაძე ვაინს ენდ სპირიტს“-ისთვის (Dugladze Wines & Spirits) შევქმენით. ერთი წლია,რაც ჩვენი კომპანია branding.ge „დუგლაძე ვაინს ენდ სპირიტს“-ის რებრენდინგის პროექტზე მუშაობს. კომპანიის მიერ წარმოებული ღვინის ასორტიმენტი ოთხ მიმართულებად დაიყო: სპეციფიკურ ზონებში წარმოებული ადგილწარმოშობის დასახელების უმაღლესი ხარისხის ღვინო, მხარის ღვინო, სუფრის ღვინო და გასნაკუთრებული ღვინოები. ბრენდი „რანინა“ სუფრის ღვინის ტიპს მიეკუთვნება. მოგეხსენებათ, ქართული სიმღერა და ქართული ღვინო ერთმანეთის განუყოფელი ნაწილია, ძნელია ითქვას, რომელი რომლით იწყება და გრძელდება. სწორედ ამ მიმართულებიდან გაჩნდა „რანინას“ იდეა.
ბრენდზე მუშაობისას შევეცადეთ პროდუქტის სპეციფიკიდან გამომდინარე, ის განსხვავებულობა დაგვეჭირა, რაც პროდუქტს გააჩნია და ჯერ კონკურენტებს არ ქონდათ გამოყენებული. გვინდოდა ისეთი რამ მოგვეფიქრებინა, რაც ქართული დროსტარების, სუფრის, ლხინის, ხალისის და მხიარულების ხასიათს კარგად გადმოსცემდა. ქართული სიმღერის მოტივებიდან აღებული და გაცოცხლებული „რანინა“ – ღვინოსთან და ხალისიან განწყობასთან ასოცირდება. ზუსტად ის ხასიათი მოაქვს,რაც გვქონდა ჩაფიქრებული. „რანინა“ ღვინოს აძლევს მსუბუქ და მხიარულ ხასიათს, რაც ასეთი ტიპის ღვინოს ძალიან უხდება. სიტყვა „რანინა“ იმდენად სახალხოა, რომ თითოეული ჩვენგანის აღქმაში ხალისიან განწყობასთან და ლხინთან ასოცირდება. იგი ჟღერადია, მარტივად წარმოსათქმელი, როგორც ქართულ ასევე უცხოურ ენებზე, აქვს „ქართულობის“ აღქმა, რაც დამატებით უპირატესობას წარმოადგენს საექსპორტო ბაზრების ათვისებისთვის.
რატომ გადაწყვიტა კომპანიამ ახალი ბრენდის შექმნა და რა უნიკალური თვისებები აქვს „რანინას“ ღვინოს?
– დღესდღეობით, ქართული ალკოჰოლური სამელების ბაზარზე იაფიანი ქართული ღვინოების უმეტესობა განსხვავებულ კონცეფციას მოკლებულია, არ ასახავს ქართულ ხასიათს და ძირითადად ფასზე აკეთებს აქცენტს. ჩვენი აზრით, მომხმარებელი რეალურად ითხოვს ამ საფასო სეგმენტში ქართული ხასიათის გამომხატველ საინტერესო კონცეფციის და ამასთანავე თანამედროვე ვიზუალის მქონე პროდუქტს. მიუხედავად პროდუქტის დაბალი ფასისა ჩვენი ამოცანა იყო ბრენდის კონცეფცია სრულად და საინტერესოდ შეგვეკრა. განსხვავებით კონკურენტების ანალოგიური პროდუქტებისგან, რომლებსაც ძირითადად ამ ტიპის ღვინო ტრადიციული საბჭოთა პერიოდის დასახელებებით აქვთ წარმოდგენილი, შევქმენით სრულიად ახალი ბრენდი განსხვავებული კონცეფციით.
ეს ბრენდი შეიქმნა ყველა იმ მომხმარებლისთვის, ვისაც უყვარს ქართული ღვინო, უნდა რომ ხალისანი განწყობა, ამღერებული ქართული ხასიათი შეიგრძნოს ამ ბრენდთან ერთად, მიუხედავად შემოსავლებისა, ასაკისა თუ სოციალური კლასისა.
„რანინა“ – სიმღერით გადმოცემული ქართული ხასიათია. „რანინა“ ლხინს მოგანდომებთ და აგამღერებთ. ეს არის ღვინო, რომელიც თავისი კონცეფციით ქართულ ხასიათს და განწყობას გამოხატავს და ამასთანავე ვიზუალურად ძალიან თანამედოვედ და არასტანდარტულად გამოიყურება. პროდუქტის საინტერესო კონცეფციისა და შეფუთვის განსხვავებული დიზაინი ვფიქრობთ, რომ მთლიანობაში ძალიან გამოარჩევს თაროზე კონკურენტებს შორის.
ბრენდის სახესა და შეფუთვის დიზაინზე, რომ მოგვიყვეთ…
– შეფუთვის დიზაინიზე branding.ge-ს არტ დირექტორმა მაკა ჭიჭინაძემ იმუშავა. დიზაინის ძირთადი ამოცანა იყო ბრენდის სახელსა და კონცეფციასთან შესაბამისობაში, შეგვექმნა ისეთი განსხვავებული, უნიკალური ვიზუალი, რომელიც ძლიერი კონკურენციის პირობებში, გამორჩეულ ადგილს დაიკავებდა ქართული ღვინის ბაზარზე. „რანინას“ ლოგოსთვის შემუშავდა ქართული ორხაზოვანი სასათაურე შრიფტი, რომელიც კარგად გამოხატავს ბრენდის არსს, ხასიათს და სტილს. შემდგომში მოხდა ქართული ასო-ნიშნების მიხედვით ლათინური შრიფტის მოდიფიკაცია საექსპორტო ბაზრებისთვის განკუთვნილი შეფუთვისთვის.
შეიქმნა ილუსტრაციები, მკაცრი შავ-თეთრი კონტურებისა და ფერადი ლაქების მონაცვლეობით, რომლებიც გაფორმების ცალკეულ ელემენტებთან ერთად განსაზღვრა კომპოზიციის საერთო სახე. ყოველი პერსონაჟი გულდასმით დაიხატა მოხაზულობის სისადავით, ფორმათა მინიმალიზმით ორგანულად შეერწყა შრიფტის ხასიათს. ორნამენტული მოტივების ელემენტები, ქართული მინიატურების და რელიეფის ხასიათს ატარებენ და ამავდროულად მკაცრ თანამედროვე ფორმებამდეა მიყვანილი. ბრენდის ვიზუალის შთაგონების წყაროდ იქცა მდიდარი ქართული კულტურა, მინიატურები, რელიეფი და ორნამენტი, რომლებშიც ემოციური, ხალხური ხასიათის პერსონაჟებია ასახული.
სიუჟეტის მთავარი გმირები არიან ქართული ტიპაჟები, გამოხატული მინიმალისტური, საავტორო სტილისტიკით. ეტიკეტი ერთი მთლიანი პატერნია, რომელშიც ტიპაჟები და დიზაინის სხვა ელემენტები საინტერესო ისტორიას გადმოგვცემენ: ილუსტრაციებში მოთხრობილია ქართული ხასიათის სიუჟეტი, რაც ქართული ღვინისა და სიმღერის ჰარმონიულ კავშირსა და ორგანულობას უსვავს ხაზს. ასორტიმენტის ფერითი კოდირებისს გამოვიყენეთ ღვინისთვის არატრადიციული მკვეთრი ფერთა გამა, რაც ზოგად ვიზუალს თანამედროვე იერსახეს სძენს.მიუხედავად იმისა რომ „რანინა“ არ არის მაღალფასიანი პროდუქტი, ჩვენი მიზანს წარმოადგენდა ისეთი შეფუთვა შეგვექმნა, რომ მომხმარებელს ცარიელი ბოთლის გადაგდებაც კი დანანებოდა. შედეგად მივიღეთ ბრენდი მკაფიო ინდივიდუალურობით, გამოხატული პოზიციონირებითა და კონკურენტებისაგან გამორჩეული ვიზუალით, რომელმაც დიდი მოწონება დაიმსახურა როგორც მომხმარებლებს შორის ასევე პროფესიულ წრეებში.
„რანინამ“ EPICA AWARDS 2015-ზე, რომელიც მსოფლიოში უმსხვილეს კრეატიული რეკლამის ფესტივალს წარმოადგენს საუკეთესო პრინტის კატეგორიაში გაიმარჯვა. როდიდან გაიყიდება „რანინა“ და გეგმავთ თუ არა საექსპორტო ბაზრებზე გასვლას?
– მომხმარებელი „რანინას“ შეძენას ახალი წლიდან შეძლებს, რაც შეეხება ექსპორტს, „რანინა“-ს ბრენდინგზე მუშაობისას გავითვალისწინეთ, როგორც ადგილობრივი ასევე უცხოური ბაზრის მოთხოვები, ვინაიდან ეს ბრენდი საექსპორტო ბაზრებისთვისაც არის გათვლილი. „რანინას“ შეფუთვამ კომპანიის უცხოელ პარტნიორებს შორის დიდი მოწონება დაიმსახურა და უკვე წინასწარი შეკვეთებიც გააკეთდა.
„რანინას“ რამდენი სახის ღვინო გაიყიდება და როგორი იქნება თითოეულის ფერი, ყურძნის ჯიში და გემო?
– ამ ეტაპისთვის დაგეგმილია რვა ტიპის ღვინის წარმოება: სამი თეთრი (მშრალი, ნახევრადმშრალი, ნახევრადტკბილი) და სამი წითელი (მშრალი, ნახევრადმშრალი, ნახევრადტკბილი). გარდა ამისა, გვექნება ქვევრში დაყენებული ღვინო, კახური თეთრი მშრალი და წითელი მშრალი. ბოთლის ღვინის გარდა მომხმარებელს ასევე შევთავაზებთ „რანინას“ სამ და ხუთ ლიტრიან მაღალი ხარისხის პეტ შეფუთვებში. „რანინა“ ეს არის სუფრის ღვინო, რომლის კუპაჯში გამოყენებულია სხვადასხვა ყურძნის ჯიში.
თუ აპირებთ, სამომავლოდ რაიმე სახის კამპანიას და რა სიახლეები გაქვთ დაგეგმილი სამომავლოდ?
– პროდუქტის ქსელში ჩაშვება ახალი წლისთვის იგეგმება, რასაც რა თქმა უნდა შესაბამისი აქტივობებიც მოყვება, უამრავი საინტერესო გეგმა გვაქვს „რანინასთან“ დაკავშირებით, რაზედაც აუცილებლად კამპანიის დაწყებისთანავე შეიტყობთ.
ნათია კეკენაძე
