საქართველოში გრიპის ვირუსის საწინააღმდეგო ვაქცინაცია დაიწყო. ამ ეტაპზე შემოსულია ორი სახის ვაქცინა – ჰოლანდიური წარმოების „ინფლუვაკი“, რომელიც სამკომპონენტიანია – შეიცავს სამი ვირუსის შტამს და ფრანგული „ვაქსიგრიპი ტეტრა“, რომელიც, შარშანდელთან შედარებით გაუმჯობესებული ფორმულითაა დამზადებული და ოთხი ვირუსის საწინააღმდეგოა. ამის შესახებ ვაქცინის იმპორტიორი კომპანიის, „ჯიპისის“ აფთიაქებში არსებული „ექსპრეს-კლინიკების“ ქსელის ხელმძღვანელმა, ირმა ჟღენტმა თქვა. ინფორმაციას 1tv ავრცელებს.
ირმა ჟღენტის თქმით, ჯანდაცვის მსოფლიო ორგანიზაცია ყოველწლიურად ადგენს, რომელი შტამის გავრცელებაა მოსალოდნელი უახლოეს სეზონზე და რომელს ახასიათებს ყველაზე სერიოზული გართულებები.
ე.წ. ფასიანი ვაქცინაციის ღირებულება 30 ლარიდან 50 ლარამდეა. ვაქცინაცია ქვეყანაში არსებულ სხვადასხვა კლინიკაშია შესაძლებელი.
რაც შეეხება სახელმწიფოს მიერ დაფინანსებულ ვაქცინაციას, ის განკუთვნილია მაღალი რისკის მქონე პირებისთვის.
ვაქცინის გასაკეთებლად საუკეთესო დრო ოქტომბერია.
