დავით ზურაბიშვილი ამა წლის 10 იანვარს გარდაცვლილ მუსიკოსზე- დევიდ ბოუვიზე აქვეყნებს პოსტს:
,,უკვე ბევრი დაიწერა დევიდ ბოუის გარდაცვალებაზე, მაგრამ ეს ამბავი რომ არ მოვყვე არ შემიძლია. ნამეტნავად პოსტმოდერნულია. მოკლედ, ოთხმოცდათორმეტის აპრილია და ფრედი მერკურის ხსოვნის კონცერტის პირდაპირი რეპორტაჟია უემბლიდან საქართველოს რომელიღაც ტელევიზიით. არ მახსოვს “იბერვიზია” იყო თუ რამე სხვა არხი, მაგრამ ფაქტია, გადმოსცეს თავიდან ბოლომდე. ან რა ენაღვლებოდათ? ლიცენზია და ეგეთი რაღაცეები სულ ცალ ფეხზე ეკიდათ მაშინ. ეს ის დროა, როცა ქალაქში იარაღიანი ტიპები დადიან და ჯერ გაეროს წევრიც არა ვართ. ჰოდა, ეს რეპორტაჟი მიჰყავს ორ ტიპს, რომლებიც ბევრს არ ლაპარაკობენ და ძირითადად აცხადებდნენ: ეს გამოდის, ის გამოდის და ა.შ. არც იმათი ვინაობა მახსოვს, მართალი გითხრათ, მაგრამ აი როდესაც დევიდ ბოუიმ სიმღერის ბოლოს ცალ მუხლზე დაჩოქილმა წასულების მოსახსენიებლად მოულოდნელად მამაო ჩვენო წაიკითხა სცენიდან, ჩვენი წამყვანები აშკარად დაიბნენ. ჯერ იყო და ერთმა სცადა სინქრონულად ეთარგმნა და დაიწყო “მამა, რომელიც არის ზეცაში და მისი სახელი არის… ” თუ რაღაც ამდაგვარი, მაგრამ გაიჭედა და ამ დროს მეორე წამოეშველა და ამბობს: “დევიდი კითხულობს მთავარ ლოცვას.” აი ასეთი ამბავი იყო. და ამ ყველაფერს მე ვუყურე თბილისში,სახლში და, თუ ვუმატებ, ანუ ვაკლებ, ან რამეს ვმალავ, არამი იყოს ის სიხარული სულით და გულით, რეპორტაჟის დროს მიღებული ღვინო და პური. გული გულს იცნობს, ღონე ღონეს, მარჯვენი მარჯვენს… ლეგენდად დარჩეს, მეგობრებო, ლეგენდად დარჩეს.“- წერს დავით ზურაბიშვილი.
გადაცემა მეორე არხზე გადიოდა და ზუსტად ამ დღეს სერგი გვარჯალაძე თარგმნიდა კონცერტს. დევიდ ბოუის საყვარელი თემა რელიგიური და სულიერი ძიება იყო. როგორც ამბობენ, იგი ბუნებით ნამდვილი ასკეტი იყო. მისი ბრენდის ,,დევიდ ბოუის” განცხადებით, ბოლო და ყველაზე პოპულარული დისკის (გაყიდვ ებში პირველ ადგილზეა), ,,ბლექსთარის” გაყიდვიდან შემოსული მთელი თანხა სიმსივნური დაავადებების კვლევასა და მის დაძლევას მოხმარდება.
მუსიკოსმა დისკის გამოცემამდე იცოდა, რომ დიდი ხნის სიცოცხლე არ ეწერა. აღსანიშნავია, რომ გერმანიის საგარეო საქმეთა სამინისტრომ მას განსაკუთრებული მადლობა გადაუხადა გერმანიის გამთლიანებაში შეტანილი წვლილისთვის. არაოფიციალური ვერსიით, 2000 წელს დევიდ ბოუიმ უარი განაცხადა ბრიტანეთის სამეფო იმპერიის კომანდორის ორდენის მიღებაზე.
მრავალი გამოკითხვის თანახმად, დევიდ ბოუი უკანასკნელი 50 წლის განმავლობაში ერთ-ერთ ყველაზე გავლენიან როკმუსიკოსად მიიჩნევა. კომპანია ,,ზიპოს” ვერსიით, ის მეოთხე ადგილზეა „როლინგ სთოუნზის”, ,,ქვინისა” და ,,ბითლზის” შემდეგ. ყველაფერი კი იქიდან დაიწყო, როდესაც 10 წლისამ ტელეფონით ცნობილ საქსოფონისტს დაურეკა და დაჟინებით მოთხოვა მეცადინეობა: ,,მშობლებმა ვალით საქსოფონი მიყიდეს და თქვენ უნდა მასწავლოთ”. ”დევიდ ბოუიმ იცის, რა გააკეთოს მომავალშიც”, წერდნენ დღეს. მომღერალი, კომპოზიტორი, პროდიუსერი და მუსიკალური სამყაროს ერთ-ერთი ყველაზე ეპატაჟური პერსონა – დევიდ ბოუი კიბოსთან 18-თვიანი ბრძოლის შემდეგ, 69 წლის ასაკში ოჯახის წევრების გარემოცვაში გარდაიცვალა. საკუთარ 69-ე დაბადების დღეზე, 2016 წლის 8 იანვარს, მან უკანასკნელი ალბომი Blackstar გამოუშვა.
ნატალია ჯალაღონია
