გარემოსა და ბუნებრივი რესურსების დაცვის სამინისტროში “კოლხური ბზის” გადარჩენის სამოქმედო გეგმის შემუშავებაზე იმსჯელეს.
როგორც “თბილისი თაიმსს” გარემოსა და ბუნებრივი რესურსების სამინისტროდან აცნობეს, საქართველოს ენდემური და წითელ ნუსხაში შეტანილი მცენარის “კოლხური ბზის” (Buxus colchica) ხმობა უკანასკნელი წლების განმავლობაში აქტიური გახდა, რამაც დასავლეთ საქართველოს ბზის კორომების მნიშვნელოვანი ნაწილი განადგურების პირას მიიყვანა.
სამუშაო შეხვედრაზე მონაწილეებმა მავნებელ-დაავადებასთან ბრძოლის ეფექტური ქმედებები, ასევე მოსახლეობის ინფორმირებისა და ჩართულობისათვის საჭირო აქტივობები განიხილეს. უწყებაში აცხადებენ, რომ ბრძოლის ღონისძიებები სახელმწიფო ორგანოებს შორის კომპეტენციათა განაწილების საფუძველზე პარტნიორი ორგანიზაციების მხარდაჭერით უნდა განხორციელდეს.
შეხვედრას სურსათის ეროვნული სააგენტოს, რეგიონული განვითარებისა და ინფრასტრუქტურის სამინისტროს, საქართველოს საპატრიარქოსა და არასამთავრობო ორგანიზაციების წარმომადგენლები დაესწრნენ.
