1-2 თებერვალს საქართველოს ზოგიერთ რაიონში ძლიერი ქარია მოსალოდნელი. როგორც “თბილისი თაიმს” გარემოსა და ბუნებრივი რესურსების დაცვის სამინისტროდან აცნობეს , შავი ზღვის სანაპირო რაიონებში, კოლხეთის დაბლობზე, ზემო იმერეთში და გორი-სურამის მონაკვეთზე აღმოსავლეთის მიმართულების ძლიერი ქარი იქროლებს. 2 თებერვლიდან, აღნიშნულ რეგიონებში, ქარის სიჩქარემ, დროგამოშვებით, შეიძლება 30მ/წმ-ს გადააჭარბოს.
მათივე ინფორმაციით, საქართველოს ტერიტორიაზე უკვე დაიწყო ხმელთაშუა ზღვიდან შავი ზღვის გავლით გადმონაცვლებული შედარებით თბილი და ნოტიო, ხოლო კასპიის ზღვის ჩრდილო აღმოსავლეთიდან დაშვებული ცივი ჰაერის მასების ურთიერთქმედება, რამაც ნალექები, მთასა და მაღალ მთაში თოვა გამოიწვია. გუდაური-კობის მონაკვეთზე ზვავსაშიშროების გამო საავტომობილო გზა ჩაიკეტა.
დღეს, დღის მეორე ნახევრიდან, აღმოსავლეთ საქართველოს ბარშიც წვიმა თანდათან თოვლში გადავა.
1 თებერვლიდან ნალექები ძირითადად შეწყდება, მაგრამ ჰაერის ტემპერატურა დღევანდელთან შედარებით საშუალოდ 10 – 15 გრადუსით დაიწევს.
30.01.14
