მილანი, პარიზი, ლონდონი, ნიუ-იორკი – ქალაქები, რომელიც მოდის კვირეულის დროს მსოფლიოს ეპიცენტრად იქცევა ხოლმე. აქ თავს იყრის უამრავი ჟურნალისტი, მოდის გურუ, ფოტოგრაფი, მხატვარი, არა ერთი ვარსკვლავი თუ ბიზნესმენი. მათთვის მოდის კვირეული ულამაზესი სანახაობაა, თეატრალური წარმოდგენა, რომლისგანაც უდიდეს სიამოვნებას იღებენ.
ამ ქალაქებში გამართულ ჩვენებაზე ყოველი ბრენდის მოდის სახლი ცდილობს პოდიუმის განათებიდან, ჩვენების შესაბამისი მუსიკის ჩათვლით, ყველაფერი იდეალური იყოს. ამისთვის ასობით ადამიანი დაუღალავად შრომობს. მათში კი, განსაკუთრებული ადგილი, ჩემი აზრით, მოდელებს უჭირავთ. გადატვირთული გრაფიკი, სხვადასხვა ჩვენებებზე გადარბენები, ამასთანავე, მუდამ იდეალურ ფორმაში ყოფნა მათი ცხოვრების განუყოფელი ნაწილი და ვალდებულებაცაა, თუმცა, ეს გასაკვირი არ არის, რადგან ისინი საბოლოო პროდუქტს წარმოადგენენ პოდიუმზე და მათზეა დამოკიდებული წარმატებული შოუს უმეტესი ნაწილი.
ბოლო დროს, უდიდესი მნიშვნელობა ენიჭება მოდელის ინდივიდუალურობასა და პიროვნულობას. მოდა ხომ გვაახლოებს საკუთარ თავთან. რუტინული და ერთფეროვანი სახეები, რომლებიც ერთ დროს შეიძლება მოთხოვნადი იყო, თანდათან უკანა პლანზე ინაცვლებს. ამ, მართლაც არანორმალურ სამყაროში უამრავი ქვეყნისა და რასის წარმომადგენელი მოდელი იბრძვის წარმატებისთვის, კონკურენციის გაწევა კი თანდათან უფრო რთული ხდება, რასაც ზემოთ ნახსენები ფაქტორებიც განაპირობებს.
სიამაყით უნდა აღვნიშნოთ, რომ ამ კონკურენტულ გარემოში ბოლო დროს სულ უფრო მეტი ქართველი გოგონა ჩნდება წამყვანი მოდის სახლების ჩვენებებზე.
თაკო ნაცვლიშვილი
წარმატებული ქართველი მოდელის ხსენებისას არ შეიძლება თაკო ნაცვლიშვილი არ გაგვახსენდეს, გოგონა, რომელიც უსწრაფესად მოექცა მოდის უმაღლეს მწვერვალზე და უკვე დიდი ხანია თანამშრომლობს ისეთ მეგა-სახლებთან, როგორებიცაა, Versace, Dolce & Gabbana Dior, Giorgio Armani და ა.შ. რომელიმე ბრენდი, რომ არ გამომრჩეს, უბრალოდ აღვნიშნავ, რომ თაკო 2016 წელს პარიზსა და მილანში თითქმის ყველა მოდის ჩვენებაში იღებს მონაწილეობას და უამრავი ფოტოგრაფის ობიექტივში პოზირებს. იგი ამ სეზონის პარიზის მაღალი მოდის კვირეულზე მიწვეული ერთადერთი ქართველი გოგონაა.
ამით ყველაფერი ნათქვამია!
თაკო, ალბათ ახალბედად აღარ უნდა მივიჩნიოთ, ასაკის მიუხედავად მან უკვე მიაღწია დიდ წარმატებას და წინსვლას განაგრძობს. თუმცა, ვფიქრობ მის წარმატებას მალე გაიზიარებენ დამწყები ქართველი მოდელები, რომლებიც ახლახანს ჩავიდნენ პარიზში და მართლაც ურთულეს ქასთინგებში იღებენ მონაწილეობას. წარმატებაც არ აყოვნებს.
მარიამ შაკიაშვილი
ლიკა ქორქია და თათია ახალაია
ახალბედა მარიამ შაკიაშვილმა თავისი განსხვავებული გარეგნობით ადვილად მოახერხა კრიტიკოსების მოხიბვლა და მალე მას Calvin Klein-ის კატალოგში ვიხილავთ! ლიკა ქორქია და თათია ახალაია იტალიური ტანსაცმლის და აქსესუარების ბრენდის, იზაბელ გარსიას 2016 წლის გაზაფხული/ზაფხულის კამპანიას წარმოადგენენ.
ანი სულაბერიძე
ირინა ჯიჯიხია და ანა შელია
ახლახანს კი იტალიაში სამი უმშვენიერესი ქართველი გოგონა, ანი სულაბერიძე, ირინა ჯიჯიხია და ანა შელია ჩაფრინდა. ისღა დამრჩენია, დაველოდო მათი სახეების ხილვას წამყვანი ბრენდების ჩვენებესა და კამპანიებში.
დაბოლოს, შეხედულება, რომ ქართველი გოგონები ვერ აკმაყოფილებდნენ საერთაშორისო მოთხოვნებს და მათი ვიზუალი დიზაინერთათვის უინტერესო იყო ვფიქრობ, ბოლო პერიოდის მოვლენებმა ნამდვილად შეცვალა და უარყო. ვიმედოვნებ, ეს ყველაფერი მხოლოდ დასაწყისია და მალე წამყვან და ყველაზე მოთხოვნად მოდელებში უამრავი ქართული სახელის ამოკითხვას შევძლებთ!
მარიამ ტაკაშვილი
