„მემარცხენე ალიანსის“ ახალგაზრდული ორგანიზაციის თავმჯდომარე სოფიკო კარტოზიამ დღეს გამართულ ბრიფინგზე საქართველოს მთავრობასა და პარლამენტს სტუდენტური დასაქმების თაობაზე ახალი ინიციატივით მიმართა.
„საქართველოში უფასო უმაღლესი განათლების არარსებობის პირობებში სწავლას მოწყურებულ ახალგაზრდებს წართმეული აქვთ განათლების მიღების კონსტიტუციური უფლება. ამ პრობლემის გამო კი ჩვენ ვკარგავთ უამრავ ნიჭიერ ახალგაზრდას. ნაცვლად იმისა, რომ ისინი ჩაბმულნი იყვნენ ძლიერი ქვეყნის მშენებლობის პროცესში, ხდება მათი უცხოეთში გადინება (ე.წ ,,ტვინების გადინება“).
მსოფლიოს უმსხვილეს სამეცნიერო და სახელოვნებო კორპორაციებში დასაქმებულნი არიან ნიჭიერი ქართველი ახალგაზრდები და სამწუხაროდ, ისინი ემსახურებიან არა საკუთარი ქვეყნის, არამედ უცხო ქვეყნის სახელმწიფოებრივ ინტერესებს.
საქართველოს მთავრობასა და პარლამენტს მოვუწოდებთ, შეიმუშაონ კანონთა პროექტი, რომლის საფუძველზეც გარანტირებული გახდება წარჩინებულ სტუდენტთა საჯარო სამსახურში ანაზღაურებადი სტაჟირება, ხოლო წარჩინებული მაგისტრანტები და დოქტორანტები კონკურსისა და გასაუბრების გარეშე გარანტირებულად დასაქმდებიან სახელმწიფო სამსახურში.
ჩვენ მიერ შეთავაზებული ინიციატივა შესაფერისად დააფასებს წარჩინებულ სტუდენტთა შრომასა და ნიჭს, სტუდენტებს წაახალისებს წარჩინებული სწავლისათვის, მოიზიდავს მეტ ახალგაზრდას მაგისტრატურასა და დოქტორანტურაზე სწავლისათვის, ეს ყველაფერი კი ხელს შეუწყობს ახალი ქართველი პატრიოტი ინტელიგენციის ფორმირებას“, – განაცხადა პარტიის ახალგაზრდული ორგანიზაციის თავმჯდომარე სოფიკო კარტოზიამ.
ნატალია ჯალაღონია
