„მიღწეულია შეთანხმება რუსეთთან და მისი პრაქტიკაში დანერგვის შემთხვევაში საქართველოს დაუბრუნდება დაკარგული ტერიტორიები. 50 დღეში ყველა პენსიონერი მიიღებს 400-600 ლარის ოდენობით რუსულ პენსიას“. ამის შესახებ პარტია „ცენტრისტების“ წევრმა ვლადიმერ ბედუკაძემ „ტვ-პირველზე’, გადაცემა „ინგა გრიგოლიას დღის ამბების“ ეთერში ისაუბრა.
„100 დღეში დაიწყება დევნილების დაბრუნების პროცესი აფხაზეთსა და სამხრეთ ოსეთში და ეს პროცესი 2017 წლის ბოლომდე დასრულდება. 2016 წლის ბოლომდე დასრულდება სავიზო რეჟიმი და გაწევრიანება ევრაზიულ კავშირში, გაიხსნება რუსული ბაზარი. ასეთი პრაქტიკა არსებობს, რუსეთის ხელისუფლება ზრუნავს თავის მოქალაქეებზე სომხეთში, სამხრეთ ოსეთში, აფხაზეთში. ეს არის პენსია მათთვის ვისაც უჭირს. ეს არის ინვესტიცია ყველა პენიონერის ოჯახში. რუსეთმა საქართველო არა ერთხელ გადაარჩინა გაქრობას. ეს არ არის ამმრჩევლის მოსყიდვა. რუსეთი არის საბჭოთა კავშირის სამართალმემკვიდრე და ვალდებულია დაიცვას ყველა მოქალაქე, რომელიც მაშინ ქმნიდა ერთიან სახელმწიფოს.
მე დავიწყე და დავასრულებ გარკვეული შედეგით. დღეს საქართველოში არის ორი პარტია: ჩვენ და „ქართული ოცნება“. ვისაც სჯერა ევროპული კურსის, ხმა მისცეს „ქართულ ოცნებას“, ვისაც სჯერა ევრაზიულ კავშირში საქართველოს გაწევრიანების, ხმა მოგვცეს ჩვენ“.
ვლადიმერ ბედუკაძემ, როგორც „ციხის კადრების“ მთავარმა ბრალდებულმა, ამ საქმის დეტალებიც გაიხსენა.
„მე არ ვარ შეწყალებული. შესაწყალებელი არავისგან არაფერი მჭირდა. ეს იყო საპროცესო შეთანხმება. ვერსად ნახავთ ჩემს ერთ აღიარებით ჩვენებასაც. პირველი ქვა მან მესროლოს, ვისაც სააკაშვილის რეჟიმის ნგრევის საქმეში ჩემზე მეტი წვლილი აქვს შეტანილი. დანარჩენმა ნაფტალინ დაყრილი ყუთიდან ამოსულმა პოლიტიკოსებმა თავი შეიკავონ განცხადებებისგან. არც ერთ ქართულ ტელევიზიას არ უცდია მაშინდელი პოლიტ-პატიმრების მიწვევა და ერთიანი გადაცემის გაკეთება, რომ წერტილი დასმულიყო“.
მანანა ღოღობერიძე
