ქართულ ბაზარზე სრულიად განსხვავებული ხელით ნაკეთი პროდუქცია გამოჩნდა. „ქოქოს შოკოლადები“ ხელნაკეთი შოკოლადის ქართული ბრენდია, რომელიც მომხმარებლებს ნატურალური პროდუქციით, ყოველგვარი ქიმიური დანამატების გარეშე სთავაზობს რამდენიმე სახის შოკოლადს. „Coco’s Artisan Chocolates“ ბაზარზე დაახლოებით ორი თვის წინ გამოჩნდა და დღეს ქართველი მომხმარებლებისთვის საყვარელ ტკბილეულად იქცა. „თბილისი თაიმსს“ ბრენდის დამფუძნებელი ქეთევან მეშველიანი ესაუბრა შოკოლადების შექმნისა და სამომავლო გეგმების შესახებ.
ჩვენს მკითხველს რომ მოუყვეთ, როგორ გაგიჩნდათ იდეა შეგექმნათ ხელნაკეთი შოკოლადები?
– ხელნაკეთი შოკოლადების გაკეთებით დაახლოებით ორი წლის წინ დავინტერესდი, როდესაც იტალიაში ყოფნის დროს სრულიად შემთხვევით ვნახე, როგორ ხდებოდა მათი დამზადება.ზოგადად ძალიან მიყვარს ტკბილეულის კეთება და ამიტომ ვიფიქრე, თუ რატომ არ შემეძლო დამემზადებინა შოკოლადებიც. მას შემდეგ, მუდმივად ძიების პროცესში ვარ. დიდი ხანია ვსწავლობ როგორ გავაკეთო შოკოლადი, ვკითხულობ, ვესწრები ლექციებს. ჩემი შოკოლადები სულ რამდენიმე თვის წინ გამოჩნდა ბაზარზე. მას შემდეგ რაც პირველი შეკვეთა მივიღე, იმხელა ინტერესი გაჩნდა, რომ სწრაფად გავრცელდა და სულ მალე ძალიან ბევრი ადამიანი დამიკავშირდა. კომპანიები მწერდნენ და მიკვეთავდნენ, რათა ქართული ხელნაკეთი შოკოლადები ეჩუქებინათ თავიანთი კლიენტებისთვის თუ ბიზნეს პარტნიორებისთვის..სულ მალე ლოგოც გავაკეთე და ორი თვეა რაც აქტიურად ვარ ბაზარზე.
რასთანაა დაკავშირებული ბრენდის სახელი?
– „ქოქო“ -ეს სახელი ჩემს თავს მე შევარქვი ბავშვობაში და მას შემდეგ მეგობრებისთვის ქოქო ვარ. როდესაც შოკოლადის გაკეთება დავიწყე, სულაც არ მიფიქრია რომ პროდუქციისთვის საკუთრი სახელი დამერქმია. თუმცა, რადგან ყველაფერს, თითოეულ დეტალს საკუთრი ხელით ვამზადებ, ეს სრულიად ჩემია და ამიტომაც გადავწყვიტე რომ ყოფილიყო „ქოქოს შოკოლადები“.
ძირითადად რა სახის პროდუქციას სთავაზობთ მომხმარებლებს?
– მხოლოდ შოკოლადის ნაწარმს ვამზადებ და შოკოლადისგან რამდენიმე სახეობის შოკოლადის კანფეტს თუ ტრუფელს. მაქვს სამი სახეობის შოკოლადი, ორი სახეობის ტრუფელი და სამი სახეობის შოკოლადისგან დამზადებული კანფეტი, რომელიც არის სხვადასხვა შიგთავსით.
როგორ შეხვდა მომხმარებელი ქართულ პროდუქციას და რამდენად ენდობიან „ქოქოს შოკოლადებს“?
– ჩემდა გასაკვირად, დიდი ინტერესით შეხვდა ქართველი მომხმარებელი ხელნაკეთ შოკოლადებს. მათ დიდ ინტერესს იწვევს, ის ფაქტი რომ შოკოლადი ხელით არის დამზადებული. აღფრთოვანებას ვერ მალავენ და საოცრად დიდი ინტერესი მოდის. მოსწონთ ვიზუალურადაც, რადგან ყველასგან განსხვავებულია. ჩემს პროდუქციას ენდობიან, რაც ძალიან სასიამოვნოა. მეც მუდმივად ვცდილობ, რომ მათი ნდობა გავამართლო და ხელნაკეთი შოკოლადებისადმი ინტერესი კიდევ უფრო გაიზარდოს ამ კუთხით.
რა სახის სირთულეები შეგხვდათ ბიზნესის წარმოებისას?
– ზოგადად ძალიან რთულია იმ ეტაპამდე მისვლა, რომ შენი პროდუქცია მომხმარებლებს მოაწონო. მნიშვნელოვანია ინგრედიენტების სწორად შერჩევა. მთავარ პრობლემას წარმოადგენს ის, რომ თითოეული ინგრედიენტი თუ შესაფუთი მასალა ძირითადად იმპორტირებულია, რაც ართულებს წარმოების პროცესს და ასევე იწვევს პროდუქციაზე ფასების ცვლილებას. შემოტანა, ტრანსპორტირება საკმოდ რთულია. შეფუთვაც კი იმპორტირებულია, რადგან გარემოსთან დამეგობრებული შესაფუთი ყუთები მაქვს, რომლებიც გადამუშავებული ქაღალდისგან მზადდება.
სად შეიძლება „ქოქოს შოკოლადი“ შეძენა და როგორია ფასები?
– ჩემი შოკოლადების შეკვეთა შესაძლებელია კონკრეტულად ჩემთან და ასევე ონლაინ მაღაზია „buyers“ საშუალებით. ერთი ცალი შოკოლადის ფასი იწყება 80 თეთრიდან. როდესაც შოკოლადები შეფუთვაშია ფასები 10 ლარიდან 17 ლარის ფარგლებშია,ღირებულება დამოკიდებულია იმაზე, თუ რა სახის შოკოლადია და რამდენი ცალია კოლოფში. შოკოლადს შენახვის ვადა აქვს 6- 8 თვემდეა, თუ გრილ ადგილას შეინახავთ. ჩემი შოკოლადი არ შეიცავს არანაირ ქიმიურ დანამატებს, მზადდება მხოლოდ ნატურალური და ბუნებრივი ინგრედიენტებისგან.
როგორია სამომავლო გეგმები და რა სიახლეებს სთავაზობთ მომხმარებლებს?
– სამომავლოდ „ქოქოს შოკოლადები“ აუცილებლად შეიცვლება. შესაძლოა რაოდენობა არ გაიზარდოს, მაგრამ სეზონურად პროდუქცია ყოველთვის შეიცვლება და განსხვავებული სახის შოკოლადებს შევთავაზებ ჩემს მომხმარებლებს. სამომავლოდ, თუ დამხმარე მეყოლება შესაძლოა მომხმარებლებს შოკოლადების ფართო არჩევანი შევთავაზო, თუმცა ამ ეტაპისთვის, ჩემთვის საკმაოდ რთულია სხვადასხვა სახის და დიდი რაოდენობის შოკოლადების დამზადება. მომავალში, ბევრად უფრო სასიამოვნო იქნება, თუ ქართულ ბაზარზე იქნება რამდენიმე სახლის ხელნაკეთი შოკოლადი. რომელიც იქნება დამზადებული ბუნებრივი კომპონენტებისგან, ყოველგვარი ქიმიური დანამატის გარეშე.
მარიამ ლეკიაშვილი