ორგანიზაციამ ,,პარტნიორობა ადამიანის უფლებებისთვის” ბათუმის საქალაქო სასამართლოში სარჩელი შეიტანა. ორგანიზაცია ბათუმის დელფინარიუმს შშმ პირებისადმი დისკრიმინაციულ მიდგომაში სდებს ბრალს და აცხადებს, რომ ამ მოწყვლადი ჯგუფებისათვის დელფინთან ინტერაქტივის ფასი 10 ლარით მეტია, ვიდრე სხვებთან, რაც თავისთავად დისკრიმინაციულ ხასიათს ატარებს.
როგორც ორგანიზაციის ხელმძღვანელი – ანა აბაშიძე ამბობს, გაუგებარია, თუ რატომ არის შშმ პირებისადმი მომსახურებაზე მეტი თანხა დაწესებული, თავად დელფინარიუიმის დირექტორი – დავით ლეკვეიშვილი კი ადასტურებს იმას, რომ საფასური მეტია, თუმცა ამას იმით ხსნის, რომ შშმ პირებს სპეციფიკური მომსახურება სჭირდებათ და ეს სწორედ ამ მიზეზითაა განპირობებული.
როგორც ირკვევა, სასამართლოში მოპასუხე ბათუმის მერიაც იქნება, როგორც დელფინარიუმის მესაკუთრე.
ნატალია ჯალაღონია