„უფრო ხშირად მიწევს შეხვედრა ეკონომიკის მინისტრთან მხოლოდ ერთი მიზეზით – ყველაზე მეტს ვცდილობ ეკონომიკას დავეხმარო და ეკონომიკა ვიცი,” – ამის შესახებ ივანიშვილმა რადიო „თავისუფლების“ გადაცემა “ინტერVIEW”-ში განაცხადა.
„უფრო ხშირად მიწევს შეხვედრა ეკონომიკის მინისტრთან მხოლოდ ერთი მიზეზით – ყველაზე მეტს ვცდილობ ეკონომიკას დავეხმარო და ეკონომიკა ვიცი. სხვა მინისტრებთან არანაირი შეხება არა მაქვს“, – განაცხადა ყოფილმა პრემიერმა.
მან ასევე დაადასტურა, რომ „ჰქონდა მონაწილეობა“ პრემიერ-მინისტრ ირაკლი ღარიბაშვილის ჩანაცვლებაში, მაგრამ არა ისე, რომ „ვიღაცას ჯარით და პოლიციით აწვებოდა“.
„შეიძლება მე ვაძლევდი რჩევას, რომელიც გაითვალისწინეს, მაგრამ შეეძლოთ, არ გაეთვალისწინებათ. ფიქრობთ, მე ძალით გადავაყენე ღარიბაშვილი?! მას ჰქონდა კონსულტაციები ჩემთან, რაც ნორმალურია. რა მექანიზმებით შეიძლებოდა, რომ მეიძულებინა იგი? იქნებ მეც ვინმემ მაიძულა? მეც ხომ წავედი, ვინ მაიძულა წასვლა? მან შეაფასა სიტუაცია, ადრეულ პერიოდებშიც ჰქონდა შეკითხვები ჩემთან – ხომ არ არის დრო, რომ მე წავიდეო. ეს საუბრები გვქონდა და ნორმალურია, ვინაიდან უფროს მეგობრად მთვლიდა“, – განაცხადა ბიძინა ივანიშვილმა.
