„ჯონ კერიმ ხაზი გაუსვა,რომ ჩვენ სახელმწიფოებრივად აზროვნება უნდა ვისწავლოთ და არ გამოვიდეთ მხოლოდ ვიწრო–პარტიული ინტერესებიდან. პერსონიფიცირება უნდა დავივიწყოთ“. ამერიკის შეერთებული შტატების სახელმწიფო მდივნის, ჯონ კერის საქართველოში ვიზიტის დეტალებზე პარტია „თავისუფალი დემოკრატების“ ლიდერმა ვიქტორ დილიძემ „ტვ–პირველზე“, გადაცემა „ინგა გრიგოლიას დღის ამბებში“ ისაუბრა.
„ეს ვიზიტი ჩვენი ქვეყნისთვის მნიშვნელოვან პერიოდში განხორციელდა. ეს არის წინასაარჩევნო პერიოდი, ვარშავის სამიტის წინა პროცესი. ჯონ კერის ვიზიტი მკაფიო სიგნალია ყველასთვის ამერიკის შეერთებული შტატების ინტერესებიდან გამომდინარე. შევეხეთ ყველა საკითხს,რომელიც ქვეყნის შიდა პოლიტიკურ–დემოკრატიულ გაერთიანებას, ასევე საერთაშორისო გარემოსა და საგარეო პოლიტიკურ საკითხებს გულისხმობს. პირველ რიგში საუბარი იყო არჩევნებთან, მრავლისმომცველ საარჩევნო გარემოსთან დაკავშირებით. ორიენტირებულები უნდა ვიყოთ ახალ პლატფორმებზე და არა ცემა–ტყეპაზე. ჩვენს მიერ მიღებულ ქცევით კოდექსში სხვა არაფერი წერია. ჯონ კერი აღტაცებით შეხვდა ამ ინიციატივასაც.
საუბარი იყო ასევე მედია–თავისუფლებაზე, განცალკევებული მაგალითების ერთობა გვაძლევს იმის საბაბს,რომ ერთხელ და სამუდამოდ დასრულდეს მედია–თავისუფლების საქმეში სახელმწიფოს ხელების ფათური. ეს არის ერთი საერთო ველი,რომელზეც არის მიბმული მედია–თავისუფლება, ადმინისტრაციული რესურსუს გამოყენება, პოლიტიკურ პლატფორმებზე და პროგრამებზე ორიენტირება, უკეთესი მომავლის შთავაზება ამომრჩევლისთვის. წერტილი უნდა დაესვას ერთპიროვნულ არჩევნებს“.
ვიზიტს არ ესწრებოდა საქართველოს ელჩი ამერიკის შეერთებულ შტატებში, არჩილ გეგეშიძე. ვიქტორ დოლიძემ გადაცემაში ამასაც გაუსვა ხაზი.
„მე დიდი ხანია ვიცნობ არჩილ გეგეშეძიეს. ის არ არის უპასუხისმგებლო და არაკომპეტენტური. იგი არის თავისი საქმის პროფესიონალი. თუმცა როდესაც აშშ–ის სახელმწიფო მდივანი არის სპეციალური ვიზიტით საქართველოში და მას ელჩი არ ესწრება, ძალიან ცუდია. ეს არის ელემენტარული დიპლომატიური ეტიკეტი.“
მანანა ღოღობერიძე
